Man United-in Sancho an rim leh tawh

Borussia Dortmund-in Jadon Sancho lei hun atan hun tiam an siam a, August 10 khan a tawp. German club thuchhuah aṭanga teh chuan Manchester United tan tun nipui transfer-ah Sancho beisei ngam a ni tawh lo. Amaherawhchu German club hian an phutna zatin Sancho hi an hralh phal reng a, United an chhaih an ni ber. English winger chungchangah thuthar a awm leh ta a, Ole Gunnar Solskjaer hoten Sancho an hnaih leh ta hret.

Manchester United hian Sancho hlawh leh agent fee chungchangah inremna an nei a, amaherawhchu English club hian Dortmund phutna zat euro maktaduai 120 (£108m) an ngam a ngai thung. Norwegian manager Solskjaer-a'n nipui transfer-a player duh ber Sancho hi la dawn tihna a la ni lo a, nipui transfer chhunga lalut turin October 5 thleng hun an nei tihna a ni zawk.

English club hian thla hmasa khan pound mak-taduai 90-in Dortmund hi an dawr tawh nia hriat a ni a, hemi ṭum hian Sancho chet ṭhat dan a zirin a man hi pound maktaduai 18-a pun chhoh theih dan a awm. Amaherawhchu United pek belhna tur hi season hnih thum chhunga pek tur a nih dawn avangin German club hian an pawm thei lo a, tun thlengin Dortmund hi an ṭannaah an la sawh sawn loa ngaih a ni.

Sancho hian kum 17 mi a nihin Manchester City aṭangin Borussia Dortmund a pan a, Pep Guardiola-a'n chelh duh mah se English winger hian first team-a khelh phakna a zawn avangin German club a pan. Season liam ta khan Sancho hian goal 17 a khung a, assist vawi 16 nei bawkin Europe-a player hmuhnawm ber zinga mi a ni.

English winger hian Old Trafford a pan a nih chuan Marcus Rashford, Anthony Martial leh rawlthar beiseiawm Mason Greenwood te nen khelhna hmun a inchuh dawn a, chutihrualin Sancho erawh a man zat thlirin bul ṭan nghal turin a ngaih theih bawk.

Manchester United hian Ajax aṭangin Donny van de Beek an lalut tawh a, tunah hian Sancho bakah Real Madrid left back Sergio Reguilon nen an sawi zawm mek. Reguilon hian season liam ta khan Europa League-ah Sevilla a champion pui a, semifinal-a Manchester United an hneh ṭumin a khel bawk.

Spanish defender Reguilon hi euro maktaduai 30 man vel tura ngaih a ni a, amaherawhchu Manchester United-in an mamawh em tih zawhna a awm. Luke Shaw-a'n season bul a ṭan thei dawn a, Brandon Williams a la awm bawk. Chutihrualin centre back pathum an hmang a nih chuan defence laiah a chhawr thei a, ke dinglama pet Williams aiin ke vei lama pet Reguilon hi mual vei lama awm turin a it awm zawk.