Inter beiseina siamtu Lukaku

Borussia-Park-ah Inter Milan an lenglut a, Romelu Lukaku goal hnih hmangin Thawhlehni zan khan mualneitu Borussia Monchengladbach 3-2 in an hneh.

Champions League inkhel hmuhnawmah Matteo Darmian hmangin Italian club-in minute 17-naah an khung. Manchester Untied defender hlui hian hmun chep tak kar aṭangin keeper Yann Sommer kap karah a khung.

First half injury time-ah Gladbach right midfielder Valentino Lazaro cross chu vengtu nei lo Alassane Plea-a'n awlsam takin a tauh lut. Antonio Conte hote khel ṭha mah se first half-ah 1-1 a ni. Second half-ah Inter an khel ṭha chhunzawm a, Lautaro Martinez a hmuhnawmn a, goal khungtu erawh a kawppui Lukaku a ni thung. Belgian striker hian minute 64-naah box chhung aṭangin ṭha takin a khung.

Minute 73-naah Lukaku bawk a rawn lang a, Manchester United striker hlui hian Achraf Hakimi thawhrah sengin Inter Milan tan goal pawimawh a khung. Gladbach lamin minute hnih hnuah an siphurh an sut ṭhen a, Marcus Thuram-a'n Alexis Sanchez ball chhuhsakin a ball pass chu Plea-a'n goal-ah a chantir.

Hun tawp thlengin inkhel a nung. Ashley Young-a'n Inter Milan tan hnai tak aṭangin a hlah. Hemi hnu hian Plea-a'n Gladbach siphurh sutna goal a khungah a inngai a, amaherawhchu VAR hmanga enlet a nih hnuah Breel Embolo a offside avangin pawm a ni lo.

Inter manager Antonio Conte chuan, "First half-ah chance ṭhahnem tak kan insiam a, goal khung kan harsat avangin kan goal chhuah kha team boruak ti chhe thei a ni. Halftime laiin an khelh ṭhat thu ka hrilh a, kan khelh dan ngai bawka kan khelh chuan hnehna kan chan thei tih ka sawi a, ka ti dik," tiin a naute an khelh ṭhat thu a sawi.