Misano hi Yamaha tana hmun ṭha - Rossi

Valentino Rossi chuan season hmasa ang bawkin Misano tlankawng chu Yamaha tana hmun ṭha a nih leh a beisei. Italy ramah hian Pathianni tlai dar 5:30-ah San Marino Grand Prix an tlan ang.

Nikum khan Yamaha bike khalhtu pathum Fabio Quartararo (pahnihna), Maverick Vinales (pathumna) leh palina Rossi te an che fuh hle, season hmasa lama an tluk loh awmchhun Marc Marquez chu tun ṭumah hian hliam vangin a inlan thei dawn lo.

Rossi chuan, "Intlansiak kan neih hmabak pahnih hi Misano-ah tlan a ni dawn, he hmuna intlansiak hi tun hma pawhin a nuam kan tiin hlawhtlinna pawh kan lo chang tawh ṭhin, a bik takin season hmasa khan kan che fuh tlang hle.

"Kuminah pawh Yamaha tan tlankawng nuam leh ṭha a nih ngei kan beisei," a ti. Team director Massimo Meregalli pawhin an rider-te lakah beisei an neih san thu a sawi a, team dang chunga awm an tum.

Season kal laiah Fabio Quartararo-a'n point 70 hmuin hma a hruai mek a, pahnihna Andrea Dovizioso nen an inthlauhna erawh point thum chauh a ni. Rossi-a'n point 45 hmuin pasarihna dinhmun a luah ve thung.