Formula 1 Hamilton-a'n hma a hruai zel
Mercedes driver Lewis Hamilton chuan Formula 1-ah a hmahruaina sawh nghet zelin Pathiannia tlan zawh tak Canadian Grand Prix-ah pakhatna a ni. Intlansiak hnuhnung zawk Monaco Grand Prix a pakhatna Nico Rosberg chu pahnihna a ni thung. Hamilton leh Rosbers inthlauhna hi second 2.2 chauh a ni.
Canada-ah hian McLaren team an che chhe hle a, lap 44 na thleng bak Fernando Alonso-a'n intlansiak hmachhawn thei loin a team-mate Jenson Button pawh lap 54-ah a tawp ve bawk. An pahnih hian an car chian loh vangin hnuh sawn ve ve an ngai hial. McLaren hian an motor engine hmanlai Honda engine chu an ringtawk tawh lo hle.
Pole position aṭanga bul ṭan Hamilton a chungnung tluan chhuak zak a, France-ah khan ṭul lo taka pitstop an hman tir avangin pathumnaah thleng mah se a chesual nawn tawh lo chiang hle. Hamilton hian kawng kawi hmasa ber hmang ṭangkai nghalin hma a hruai nghal a, a elpui driver dang tan hun ṭha a siamsak ve meuh lo a ni ber mai.
Ferrari team pawhin beisei angin season hmang chiah lo mah se Mercedes an um ve zel a, qualifying-a a tlan ṭhat loh avangin Sebastian Vettel chuan 18 na aṭangin intlansiak bul ṭan mah se panganaah a thleng. A team-mate Kimi Raikkonen chu palinaah a thleng ve bawk.
Kum 2007 khan helai hmunah hian Lewis hi a vawikhat nan pakhatna a ni ṭan a, hemi hnu hian hnungtawlh tawh loin Pathiannia hnehna a chan leh chiah kha intlansiak a hmachhawn tawh aṭanga vawi 37 hnehna a channa chiah a ni. Michael Schumacher, Alain Prost, Ayrton Senna leh Sebastian Vettel te hnung zuiin chak tam ber pangana a ni ve ta.
Kum 2007, 2010 leh 2012 khan Hamilton-a'n Canada-ah hian hnehna alo chang tawh bawk a, mahse hetih hunlai hi chuan Hamilton hian McLaren car a khalh thung a ni.
Britrish chhuanvawr Hamilton chuan, "He hmuna intlansiak hi nuam ka tiin Montreal leh a khawpui chheh velte hi nuam ka ti takzet a ni. Nico kha a tlanchak em avangin inthlahdah na hun min pe miah lo a, car, team leh keimah kan balance a ṭhat em avangin hnehna ka chang hram ni berin a lang. He hmunah hian ṭum dangah pawh hlawhtlinna ka lo chan tawh avangin beiseina ka nei sang sa a, ka beisei ang ngeia hnehna ka chang thei hi ka lawm a ka hlim takzet a ni," tiin a sawi.
Tun season intlansiak pasarih aṭanga vawili hnehna chang thei Hamilton hian driver championship-ah point 17-in Rosberg lakah hma a hruai fal mek. Contructors' Championship-ah Mercedes an chungnung fal zel a, point 285 hmuin anmahni hnaih bertu Ferrari nen an inthlauhna chu point 105 lai a ni tawh.