Barca-in Vidal an la lut

Champions League champion Barcelona chuan pound maktaduai 16-in Sevilla defender Aleix Vidal an la lut.

Catalan club hi kum 18 hnuai lam player an lak luh dan dik loh vangin FIFA-in kum 2015 chhung player lak luh an phalsak lo. Barca hian Vidal hi January 2016 aṭangin an chhawr ṭan thei chauh ang.

Kum 25-a upa Vidal hian kum nga atan contract a ziak a, nimin khan medical a paltlang.

Barcelona chuan, "Barcelona leh Sevilla te chuan Aleix Vidal chungchangah kan inrem a, kum 25-a upa hian kum nga chhung (June 30, 2020) kan hnena khel turin contract a ziak," tiin thuchhuah an siam.

Vidal hi Tarragona, Catalonia-ah August 21, 1989 khan a piang a. Barcelona, FC Cambrils, Real Madrid leh Reus youth system hnuaia a awm hnuin Barcelona khaw club Espanyol a zawm.

Espanyol aṭanga inzirchhuak ni mah se Vidal hian first team-ah hmun a chan phak loh avangin club tenau Pobla Mafumet, Gimnastic leh Mallorca B-ah te a khel kual a, a larchhuahna tak erawh Almeria a ni.

Vidal hian kum 2011 khan Almeria a zawm a, kum thum chhungin match 120 khelin goal sarih a khung. Season ṭan tirh khan Sevilla a zawm a, Europa League champion-na kawngah player pawimawh a ni.

Right back leh right wing-a khel thei Vidal hian contract hmang zo Dani Alves a thlak tura ngaih a ni.

Vidal hi ram tan a la inlan lo a, Spain-in Costa Rica leh Belarus an hmachhawn turah a vawi khatna atan koh telh a ni.