Mourinho-a'n Falcao lam a hawi

Colombia forward Radamel Falcao-a'n Inrinni zana Costa Rica nen friendly match an khelh ṭumin chakna goal a khung.

Manchester United-a hlawh­tling lo Falcao hi Premier League champion Chelsea-in Didier Drogba thlaktu atan an iai lo.

Chelsea manager Jose Mourinho chuan, "Team ṭha zawk din kan tum a, kan team hian player kan chan lo ang. Season thar atan striker kan mamawh a, season tluana che ṭha turin striker hman tlak pathum tal kan mamawh," tiin striker lak luh ngei an tum thu a sawi.

An player duhzawng sawi zuiin Mourinho chuan, "Tawn­hriat nei ṭha kan duh a, minute 10 lek field chhungah a lut a nih pawhin a luh hun hmang ṭangkai thei kan duh. Inkhelh kalhmang thlak danglam thei player hi kan zawn a ni," tiin a sawi.

Portuguese coach sawi striker sawi hi Radamel Falcao ni ngeia rin a ni a, Falcao hian Manchester United tan season tluanin goal li chiah a khung.

Mourinho chuan sawi chhunzawmin, "Player tupawh la lut ila staring eleven chan nghal chu a har ang. Forward-ah Diego (Costa), keeper-ah (Thibaut) Courtois, midfield-ah (Nemanja) Matic emaw (Cesc) Fabregas emaw aia ṭha hmuh hi chu a harsa khawp ang," tiin starting eleven chang nghal tur player a melh loh thu a sawi zui.

Falcao hian Monaco-ah kar khatah £240,000 a hlawh a, Chelsea zawm a tum a nih chuan tuna hlawh aia tlem hi a inhuam a ngai dawn a ni.

Chelsea hian Falcao bakah Christian Benteke, Edinson Cavani, Zlatan Ibrahimovic leh Alexandre Lacazette te an enthla mek niin report ṭhen­khatah chuan tarlan a ni.