Overtime-ah Cavaliers an chak hram

NBA final Game 1-ah overtime khelh a ni a, Golden State Warriors an chak. Game 2-ah pawh overtime khelh leh niin Cleveland Cavaliers an chak thung. NBA final history-ah a vawi khatna atan Game 1 leh Game 2-ah overtime khelh a ni.

Thawhṭanni zing khan Oracle Arena-ah Lebron James leh a hoten hnehna an sual chhuak a, Cavaliers court Quicken Loans Arena-ah Nilaini zing dar 6:30 khian Game 3 khelh a ni ang.

Cavaliers-in Game 1-a inhliam Kyrie Irving an chhawr theih tawh dawn loh avangin Warriors chu rinkai ni mah se 93-95 in an chak lo.

Warriors guard Curry final-a three point hlah nasa ber record thar a siam. Regular season-a MVP-a thlan Curry hian point 19 chiah a score a, three points luh tumin vawi 13 a shot-ah vawi hnih chiah a lut.

Curry chet fuh loh zanah a kawp­pui Klay Thompson-a'n point 34 zet a lut a, result erawh a thlak pha lo.

Cavaliers thiampuipa LeBron James erawhin triple double (points, rebounds leh assists-ah point 10 a score tling vek) a nei a. James hian minute 50 chhung inlanin 39 points, 16 rebounds leh 11 assists a nei pha hial.

Cavs innghahna James tih a chiang a, chutihhrualin second 10.1 chauh a awm tawha point guard Matthew Dellavedova-a'n freethrow pahnih a lut ve ve chu Cavaliers chakna chhan taka ngaih a ni.

James chuan, "Ka theihna zawng zawng ka chhuah a, team chung­ah rinna ka nghat tel bawk. Kan chakna hi team thawhrah a ni. Dellavedova chungah khan rinna kan nghat a, a hnathawh kha ropui a ni. Tunah chuan Warriors nen kan intluk leh chiah a, a phurawm khawp mai," tiin inkhelh banah a sawi.