Sterling chunga rinna nghattu Hodgson

Pathianni khan friendly match-ah England leh Republic of Ireland goal awm loin an inhnehtawk.

Liverpool chhuahsan duhtu Raheem Sterling a che ṭha lo a, supporter ṭhenkhatin an 'boo' hial. Chutichung chuan England boss Roy Hodgson chuan Sterling chunga rinna an nghah zel tur thu a sawi.

Inkhel chu

Kum 1995 khan Dublin-ah England leh Republic of Ireland ten friendly match an khelh ṭumin buaina a chhuak a, an inhnehtawk.

Kum 20 hnuah England-in inkhel turin Dublin an tlawh a, an inkhelin beisei a pha lo. Minute 44-naah Adam Lallana hmangin England-in chance hmasa ber an ni a, Liverpool winger hian a pet over.

England captain Wayne Rooney-a'n Sir Bobby Charlton record goal 49 pha turin goal hnih chiah a mamawh tawh a, amaherawhchu a chance neih a hmang ṭangkai lo. Leicester forward Jamie Vardy-a chu a vawi khatna atan England tan inlan a, goal erawh a khung lo.

England keeper Joe Hart-a'n hna a nei lo a, goal awm loa an inhnehtawk hi result awm tak a ni.

Sterling-a chungchang

England boss Hodgson chuan, "Media lamin an beih nasat avangin hun harsa tak a hmachhawn mek a ni. England tan hna ṭha tak a thawk tawh a, Ireland kan khelh ṭumin ṭum dang pha lo mah se England national team chuan rinna kan hloh dawn a nih chuan hun tam zawk kan mamawh ang," tiin Sterling an rin chhunzawm tur thu a sawi.

Liverpool-in kar khata pound nuai khat hlawh turin Sterling an thlem a, English rawlthar hian a hnawl.

Republic of Ireland an khelh ṭumin Sterling hi minute 67 chhung a inlan a, mipui ṭhenkhatin a inkhelh chhung zawng an au el.

England hian Pathianni zanah Slovenia nen 2016 Euro Qualifier an khel ang a, Republic of Ireland-in Inrinni zanah Scotland an hmachhawn ve bawk ang.

England tana a khelte

Formation 4-3-3: Hart; Jones, Cahill (Jagielka 74'), Smalling, Bertrand; Milner, Henderson, Wilshere (Barkley 67'); Sterling (Townsend 67'), Rooney (Vardy 75'), Lallana (Walcott 82').

Unused subs: Austin, Cleverley, Clyne, Delph, Gibbs, Green, Heaton.