Hmalam hun sawi chiang duh lo Enrique
A season khatnaa ropui taka Barcelona kaihruaitu coach Luis Enrique chuan season tharah catalan club a enkawl chhunzawm dawn leh dawn loh a sawi duh lo. Player a nih laia Barcelona tan pawha lo khel Enrique hian kar hmasa inrinni khan Barcelona hi Champions League final-ah Juventus hneh puiin treble champion a nihpui.
Beisei phak bakin a season khat enkawlnaah Enrique hian Barca chet ṭhat pui mah se chhuak tur anga sawi thuthang a awm hle a, mahse Spanish coach hian a hmalam hun a sawi chiang duh lo.
Kum 45-a upa manager chuan, "Thudik tak chu season tharah he hmunah hian ka la awm dawn leh dawn loh ka hre lo hi a ni. Tun dinhmunah chuan ka hlim khawp a, tuna ka duh ber chu kan hlawhtlinna te nuam ti taka lawma nipui chawlh nuam taka hman hi a ni," a ti.
Real Madrid tan pawha lo khel tawh manager chuan a hmalam hun a tihchian thuai tur thu sawiin, "Rei lo teah thutlukna ka siam ang. Kan inthlak danglam nasat avangin ka tan chuan kumin hi kum harsa tak a ni. Ka chunga rinna nghattu leh Barcelona kaihruai tura min ring tlattu te chungah lawmthu ka sawi duh a ni," a ti.
Spnaish manager chuan amah sawiseltu te chhangletin, "Min sawisela min sawichhe tute min sawina zawng zawng hi engahmah ka ngai lo. Kumin a match 60 kan khelhah vawi ruk chiah tlawmin vawi li kan khingpuite nen kan inhnehtawk a, Barcelona-a season duhawm ber pawl kan hmang a ni," a ti.
Season laihawl vela Barca thiampuipa Lionel Messi nen boruak nei anga an sawi Enrique chuan kum sawm chhung chu tuma khin phak rual lohin Barcelona chu Europe-a team ṭha ber an nih thu a sawi bawk.