Man City-in pakhatna dinhmun an nemnghet

Manchester City chu Champions League group C pakhatna dinhmun luah nghet turin Thawhlehni zan khan FC Porto nen goal awm loin an inhnehtawk. Pep Guardiola hote hian point 13 an hmu tawh a, head to head-ah Portuguese club aia an san zawk avangin pakhatna an ni chiang tawh.

Group C inkhel dangah Olympique Marseille-in Dimitri Payet goal hnih hmangin Olympiakos Piraeus chu 2-1 in an hneh a, team pahnih hian Europa League khel tur an zawng. UCL-a pathumna hian Europa League an khel chhunzawm ṭhin.

Man City-in kawng engkimin inkhel an thunun a, ball posession pawh 68% neiin goal attempt pawh vawi 18 an nei. Porto tan Argentine keeper Agustin Marchesin khelh ṭhat zarah hian English club an chelh.

Pep Guardiola hote hian kartawpah Burnley an sawp a, Estádio do Dragao-ah an goal nawr pawh a na hle. Amaherawhchu Porto-in defender panga an chhawr a, Marchesin-a'n ṭum thum ṭha zetin a dang. Spanish forward Ferran Torres goal khung tur ṭum hnih leh Raheem Sterling te goal khung tur a dang ṭha takzet.

Minute 80-naah Bernardo Silva cross Gabriel Jesus-a'n ṭha takin a tauh a, keeper Marchesin-a'n dang hman mah se a per chu Jesus-a'n a ti goal leh tho. Amaherawhchu VAR hmangin an en let a, Joao Cancelo offside vangin pawm a ni lo.

Manchester City boss Pep Guardiola chuan, "Portugal-a team ṭha ber zinga mi lakah ṭha takin kan khel thei a, kan khelh danah ka lungawi. Amaherawchu goal venghim tura player pariat an awm reng avangin a awlsam lo. Group hmahruaitu ni chungin knockout stage kan lut a, a lawmawm hle," tiin a sawi.

Porto coach Sergio Conceicao chuan, "Tlarhnung kan rem phui ṭha a, kan khelh dan khan Portugal hming kan ti ṭha. Tlarhma lamah erawh kan duh angin kan khel thei lo," tiin an tumah an hlawhtling thu a sawi.