A hma huna buai lo Theo Walcott

Arsenal forward Theo Walcott chuan a hmalam hun ngaihtuaha a buai loh thu leh a duh ber chu a ṭha thei ang bera football khelh a nih thu a sawi.

Arsenal-ah kum khat daih chiah contract a neih tawh avangin Theo Walcott a hmalam hun turin sawi a hlawh hle a, a contract a pawh sei mai loh avangin mi tam tak chuan kum 2006 a Southampton aṭanga a pan North London club hi a chhuahsan dawn niin an ngai hial a ni.

Inhliam vangin Walcott hian tun season-ah a hun tam zawk chu bench-ah a hmang. Premier League-ah vawi li chiah inkhel bul ṭangin goal nga a khung. Khel tam lo mah se a khelh chhunah chuan a khel chhe hran lo. Arsenal boss Arsene Wenger chuan a player duhlai hi contract thar ziah pui tura an nghah reng thu a sawi ve bawk.

Kum 25-a upa Walcott chuan, "Ka hmalam hun tur ka ngaihtuah buai hran lo, ka duh leh tum ber chu Arsenal tana ṭha taka khelh a ni tawp mai. Tunah chuan kan ram England tan ka rilru ka seng rih thung. Ka agent hian ka tana ṭha tur a hriat avangin ka ring tawk a, ani hian thutlukna ṭha tak min siam sak thei ang." tiin a sawi.