Verona-ah Toni a cham dawn
Italian veteran striker Luca Toni chuan season tharah a club khelh mekna Hellas Verona-ah ala cham dawn tih chu 99%-a a chian thu a sawi.
Kum 38-a upa striker hi Inter Milan striker Mauro Icardi nen season hman zawh takah Serie A top-scorer an ni a, 2006 World Cup-a Italy champion puitu striker hian match 38 a inlanah goal 22 a khung a ni.
Tun thla tawpa Verona-a a contract neihlai hmang zo tawh tur Toni chuan, "Season tharah Verona tana ka inkhelh leh hi 99%-in ka ring a ni. Engmah tihchian ala awm lo a, club president Maurizio Setti-a'n director thar a mamawh te ruat phawtin player contract lam a hawi dawn chauh a ni. Chuvangin ka nghak rih phawt ang," tiin president nen inbiakna an la neih tur thu a sawi.
Fiorentina striker hlui hi Australia lama A-League club Adelaide United nen sawizawm an ni a, Australia club hian Toni nen an inbiak thu an lo puang tawh nghe nghe. Mahse, Toni-a sawi dan anga thil a thleng a nih chuan Australia lam hi a pan hmel loh ta hle.