Hmeichhe World Cup Norway leh Germany-in goal an sur tir

Canada rama neih mek hmeichhe World Cup-ah goal a lut hnem a, Pathianni zanah khan Norway leh Germany te chuan an khingpui an sawp.

Kum 1995 champion Norway chuan a vawi khat nana World Cup khel Thailand chu 4-0 in an sawp a, Norway tan Isabell Herlovsen chuan goal hnih a khung bakah Trine Ronning leh Ada Hegerberg te'n goal khat ve ve an khung bawk.

Germany hmeichhe team-in an mipa team te tih theih tih ve ngei an tum a, Hmeichhe world champion nih an tumna kawngah Pathianni khan Ivory Coast chu 10-0 in an sawp. Germany tan Celia Sasic leh Anja Mittag te chuan hat-trick an siam a, Simone Laudehr, Sara Dabritz, Melanie Behringer leh Alexandra Popp te'n goal khat ṭheuh an khung bawk.

Entu ngah Canada an chak

Pathianni zan World Cup opening match-ah a thlengtu Canada chuan China 1-0 in an hneh. Minute 90 chhung goal a luh tawh loh hnuah Canada an vannei a, hun pek belhah penalty an hlawhchhuak. Striker Christine Sinclair chuan penalty hi goal-ah chan tirin Canada hi hnehna a chanpui ta a ni.

Canada leh China inkhel hi Edmonton khawpuia Common­wealth Stadium-ah khelh niin a hmunah mi 53,000 in an en a, Canadian hmeichhe football history-a entu an tam ber ṭum a ni.

Pathianni zan inkhel dangah Netherlands-in 1-0 in New Zealnd an hneh bawk. Goal awmchhun hi Lieke Martens thun a ni.