Marquez a dinhmun hi awih a har zawk - Rossi
Yamaha rider Valentino Rossi chuan tun season-a Honda rider Marc Marquez-a chet chhiat dan chu awihawm loh leh mak a tih thu a sawi.
World champion nilai Marquez hian tun season intlansiak vawi ruk an hmachhawn tawh aṭangin vawi khat chiah hnehna ala changa, a tlan ṭhat tawk loh bakah Marquez hi a vanduai ve hle. Termas de Rio Hondo-ah Rossi nen an intai avangin intlansiak a hmachhawn thei lo a, intlansiak hnuhnung ber Mugello-ah Andrea Iannone lakah a chetsual avangin point a hmu lo bawk.
Riders' championship-ah pawh point 69 chauh la hmuin pangana a ni pha ṭawk chauh a, hmahruaitu Rossi chu point 49 zetin a thlau tawh.
Nikum khan Marquez hian MotoGP hi a thunun hneh hle a, intlansiak hmasa sawmah hnehna a chan fai vek bekah England, Malaysia leh Spain-ah te pakhatna ni bawkin point 362 zet hmiin a champion chiang hle. Marc-a'n heti khawpa season ṭha a hman zawh chauh avang hian Rossi-a'n Marc a dinhmun mak a tih thu a sawi pawh hi thil mak a ni hran lo.
A elpui chanchin sawiin Rossi chuan, "Tun dinhmuna Marc-a awmna hi kan ngaihtuah chuan a awihawm lohin rin a har zawk hial a ni. A vanduaina hi kan hmuh kan thiang lo anga, Honda team hian in enfiah an ngai ve pawh a n i mahna. An inrelbawlnaah hian fuh tawk lo deuh lai a awm vang pawh a ni maithei. He hian thil chiang taka min zirtir chu thil hi ka duh leh beisei angin a kal reng lem lo tih hi a ni awm e. Mahse tuna an chet fuh loh deuh avang hian Marc leh Honda hi an chhe ta duai tihna a ni hran lo," tiin a sawi.