Argentina tan Aguero leh Di Maria
South America khawmualpui ram te inelna Copa America chu June 11 khian an khel tawh dawn a, tournament khelh ṭan tak tak hma in ram hrang hrang te'n friendly match an khel nasa hle.
Pathianni zan khan Copa chawi tura beisei zinga mi Argentina chuan 5-0 in Bolivia an sawp a, Manchester khaw chhuak club pahniha khel Sergio Aguero leh Angel Di Maria te an vul.
Manchester City striker Aguero hian goal thum khungin international match-a a hat-trick hmasa ber a siam a, Manchester United tan a beisei phak lo Di Maria-a'n a thiam ala theihnghilh lo tih tilangin goal hnih a khung thung.
Argentina hi Copa America-ah an zinkawng hautak hle tura ngaih a nih avangin warm up match-a ropui taka an khel thei hian inrintawkna nasa tak a pe ngei ang. Kum 1993 hnua Copa-a la champion leh lo Argentina hi group khatah champion lai Uruguay, Paraguay leh Jamaica te nen an awmho a ni.
Brazil pawh an chak e
Copa America puala inbuatsaihna inkhel dangah Brazil-in World Cup-a an mualpho hnua an coach thar Dunga hnuaiah hma an sawn zel a, Pathianni zan khan Mexico chu 2-0 in an hneh.
Sao Paulo-a inkhelah hian Liverpool midfielder Philippe Coutinho chuan ram tana a goal hmasa ber a khung a, Chinese club Shandong Luneng striker Diego Tardelli chuan goal khat dang a khung ve bawk.
Brazil-in Dunga hnuaia an match zawng zawngah chak lo hmel an la hmu lo a, goal hnih chiah chhuahin match kaw chhung chu a zawnin an chak ta.
Brazil hian Copa America ṭan hma in friendly match vawi khat an la khel leh dawn a, Nilaini khian Honduras an hmachhawn ang.
Guatemala sawptu Uruguay
Uruguay-in Copa America title an kawl lai humhim ngei an tum tih tilangin an warm-up match-ah Guatemala chu 5-1 in an sawp.
Inrinni zana inkhelah hian Champions League final khel Luis Suarez chu ram tan a inlan thei lo a, Uruguay star striker inlan theih loh zanah Edison Cavani a parvul thung.
PSG striker hian Uruguay tan goal hnih a khung a, Diego Rolan, Abel Hernandez leh Giorgian De Arrascaeta te'n goal khat ṭheuh an khung bawk.
Guatemala tan Wilson Lalin chuan minute 79 naah rawn khung ve mah se awmzia a nei tawh lo a, team chungnung leh ṭha zawk Uruguay 5-1 in an chak.
Inkhel results
Ecuador 4-0 Panama
Colombia 1-0 Costa Rica
Paraguay 2-2 Honduras