Liverpool striker thar Ings

Season hman zawh taka che chhe tak Liver­pool-in Manchester City aṭanga James Milner an lakluh hnuin Burnley striker Danny Ings an lalut ve leh ta.

Kum 22 a upa English striker hian Burnley-a a contract neihlai a hman zawh tawh avangin a duh duh lam a pan thei a, July 1-a medical nei turin Anfield a pan dawn ta a ni.

Premier League khelh zawh taka goal 11 khungtu Ings hi kum 24 hnuailam a nih avangin a contract tawp tawh mah se a club khelhna hnuhnung ber Burnley hian Liverpool hnen aṭangin zângnadawmna an dawng thei a, pawisa an inpek tur zatah an la inbe rem thei lo.

Club pahnih hi zângnadawmna inpek tur zatah an inrem thei lo a nih chuan court-in an pawisa inpek tur zat hi an chin fel sak a ngai dawn a ni.

Burnley thuchhuak chuan, "Liverpool-in zângnadawmna min pek an tum zat chu kan hnar rih a, inremna neih thuai beiseiin inbiakna hi kalpui chhunzawm zel a ni ang," an ti.

England Under-21 international hian season thara Premier League khel tur Bournemouth aṭangin pound maktaduai khatin Burnley hi a pan a, kum li Turf Moor-a a cham chhungin match 130 khelin goal 43 a khung a ni.

Season hman zawh takah Liverpool-in beisei an phak lo a, goal khung an harsat hle. Inhliam vangin Daniel Sturridge a talbuai a, Premier League-ah goal li chiah a khung. An striker dang Mario Balotelli leh Fabio Borini te chuan Premier League goal khat chiah khungin Southampton aṭanga an lak Rickie Lambert chuan goal hnih a khung thung. 2014-15 season-a Reds player zinga Premier League goal khung hnem ber chu captain Steven Gerrard niin USA lam pan tur English midfielder hian goal kua a khung a ni.

Goal hmaa an har­satna chingfel turin Liverpool chuan Ings hi an beisei dawn a ni.