FIFA buaina Russia leh Qatar-in World Cup thleng lo maithei

Swiss court-in a chhui chian mek 2018 World Cup leh 2022 World Cup thlengtu tur Russia leh Qatar chu an puhna anga dik lo taka World Cup thlen an lo tum reng a nih chuan FIFA World Cup an thleng thei dawn lo.

FIFA hruaituite zinga mi Domenico Scala chuan he thu hi sawichhuakin, "Qatar leh Russia hian World Cup thlen an tumna lamah puh hmingchhiat an nih anga sum leh pai an lo seng ngeia, vote an lei a nih chuan an World Cup thlen tur hi sut leh a ni ang," a ti.

Scala chuan he thu hi Switzerland chanchinbu lar Sonntagszeitung hnenah sawiin, "Qatar leh Russia hian an tisual ngei a ni tih fiahna erawh vawiin thlengin a la awm lo. An puhna zawng zawng hi a dik a nih ngat chuan World Cup thlen hi an phu lo a ni," a ti.

Kum 2013 tawp lam khan Russia leh Qatar World Cup thlen tur hi sawi neuh neuh a lo awm tawh a, Scala vek hian an puhna te hi a dik anih chuan 2018 leh 2022 World Cup thlenna tur hmun hi sawn a nih tur thu a lo sawi tawh a ni.

Swiss court-in 2018 leh 2022 World Cup a chhuichian hma hian FIFA chuan American dan hremi lar Michael Garcia chu a lo chhui chian tir tawh. Mahse, FIFA thiltih dan hi foot­ball khawvelin a pawm lo hle a, anmahni hmai phihfai an tumna ang leka ngaih a ni.

Kum hnih lai a zirchian hnuin Michael hian FIFA hnenah phek 430-a chhah report a thehlut. Nikum November thla khan FIFA chuan report hi a puangzar a, Russia 2018 World Cup leh Qatar 2022 World Cup thlen danah dik lo engmah a awmlo nia tarlan a ni.

Mahse,a chhui chiang­tu ber Michael chuan a thil zirchian chu a report ang niloin FIFA-in an puanzar thu a sawi a, kar khat hnu lawkah FIFA hnenah a banna a thehlut zui.

FIFA erawh a dinna ngaiah a ding a, dan hremi dangin Michael Garcia report hi an zirchian thu leh Russia leh Qatar World Cup thlen danah dik lo engmah a awm loh thu an sawi.