FRENCH OPEN French Open champion thar Stan Wawrinka

Pathianni zan khan Stanislas Waw­rinka chuan a vawi khat nan French Open champion nomawi a chawi a, final-ah World number 1 Novak Djokovic a hneh. A zawna kum nga chhung Rafael Nadal-a'n ro a rel hnuah champion thar kan hmu ta.

Kum 30-a upa Wawrinka hi final khelh hma hian chak zawk tura beiseitu tam lo mah se, tun season a vawi 28 chak tawh leh hneh loh la tawng lo Djokovic chu darkar thum leh minute 12 chhungin 4-6, 6-4, 6-3, 6-4 in a hneh.

Final thleng turin Serbian Djokovic hian vawi kaw champion tawh Rafael Nadal a hneh bakah seeded pathumna Andy Murray a hneh avangin final-ah hian inrintawkna a nei sang hle. Mahse, a khingpui Wawrinka pawh hian seeded pahnihna Roger Federer leh Jo-Wilfried Tsonga a hneh ve bawk avangin a zam bik miah lo tih kan hmu.

Philippe Chatrier court-a inkhelah hian Djokovic-a'n bul a ṭan fuh zawk a, anmahni service hmang ṭangkai ve ve ṭhin annih laiin game sarihnaah Wawrinka service chhuhsakin set khatna chu 6-4 in a la. Mahse, set hnuhnung pathum erawh sevice leh backhand nei ṭha Wawrinka chan a ni thung. Ball Play thiam viau mah se Djokovic hian Wawrinka ball vuak na tak tak leh a bakckhand ṭha tak takte chu a chai thei meuh lo a ni.

Lal thar chu

Swiss professional tennis player Wawrinka hi kum 1985 khan a piang a, kum riat mi lek a nih lai aṭangin tennis khel ṭanin kum 15 a nih chuan hun puma inkhel turin tennis a luhchilh. Kum 2003 khan junior French Open-ah a champion. Kum 18 mi chauh ala nih laiin Roger Federer-a te kiangah Switzerland Davis Cup squad-ah a tel ve.

Kum 2006 khan ATP tour level nomawi hmasa ber chu Umang-ah chawiin final-ah hian Djokovic chu hliam vangin a inkhel tluan thei lo. Kum 2008 aṭang khan world rangking-ah top 10 a kai ve a ni. Kum 2014 khan Australian Open quarterfinal-ah Djokovic hi a lo hneh tawh a, he mi kum hian final-ah Nadal hnehin a vawi khat nan Grand Slam nomawi a chawi.

Eng nge an saw?

Champion Wawrinka a lawmpui thu sawiin World number 1 Djokovic chuan , "Stan ka lawmpui takzet che tih hi tunah chuan thil sawi har tak ni mah se ka lawmpui che tih hi min hriat sak rawh. I thawhrim leh tumruh vanga hetiang thleng thei i ni tih ka hrait vangin ka lawmpui em em che. Kan team, ka chhungte, ka nupui leh French mipuite chungah lawmthu ka sawi bawk. Nakumah chuan champion turin ka lo kir leh ang," tiin a sawi.

French Open champion thar Wawrinka chuan, "Tun hma ka la tawn ngaih loh boruak ka tawng ve ta mai hi ka tan chuan hriatthiam a harin sawi tur ber pawh ka hre lo hial a ni. Ka coach Magnus Norman chungah lawmthu ka sawi a, tun dinhmun ka thlen theih nana thawh hlawk leh sulsutu a nih avangin a chungah ka lawm takzet. Novak hi player ṭha leh ropui tak a nih avangin engtikah emawh chuan helai hmunah hian ala champion ngei ang tih ka ring," tiin a sawi.

Grand Slam dang pathuma champion tawh Djokovic hian a hmabak pakhat ala hlen thei rih lo, Grand Slam pali champion kim thei Andre Agassi, Don Budge, Roy Emerson, Roger Federer, Rod Laver, Rafael Nadal leh Fred Perry te hnung zui turin a tlem berah thla 12 tal a nghah leh rih a ngai dawn.

Australian Open ni lo Grand Slam dangah Djikovic hi a vannei tawk lo deuh ṭhin a, final vawi 11 a khelh tawh aṭangin vawi thum chiah hnehna ala chang. Grand Slam nomawi pariat chawi tawhin heng zinga panga chu Australian Open a ni.