Champion PSG an chak lo nghal

Paris St-Germain chuan Ningani zan khan season thara an league match hmasa ber an khel a, French champion hi kai thar Lens lakah 1-0 in an tlawm. Goal awmchhun hi Ignatius Ganago-a'n minute 57-naa a khung a ni.

Champions League final khelh vangin PSG hian team dang aiin season an ṭan tlai bik, an match neih tur hmasa pahnih chu an khelh hun sawn hlatsak an ni. Ligue 1 an khelh theih hnuah pawh an player pawimawh pasarih ngawt chu coronavirus an kai avangin an inlan thei lo.

Player inlan thei lo zingah hian Neymar, Kylian Mbappe, Angel di Maria, Marquinhos leh Mauro Icardi te pawh an tel. Captain leh tlarhnunga ban rinawm ni bawk Thiago Silva a awm tawh loh bawk avangin season hmasa lama an boruak ang kha chu an la phak lo hle.

Season hmasa khan Covid-19 vangin Ligue 1 hi match khelh hmabak 10 nei chungin tihtawp a ni a, season thar an ṭan hnuah erawh a hmuna entu awm chungin match an khel thei! PSG leh Lens inkhel pawh hi a hmunah mi 5,000 in an en thei.

Thomas Tuchel-a naute hian Pathianni zan dar 12:30-ah Marseille an mikhual leh nghal ang.