Tottenham tan chak a pawimawh Arsenal an indahṭha thei thung

Tun kar tawpah North London Derby khelh a ni dawn a, chumi hma chuan zaninah Europa League khelh hmasak a la ngai. Tottenham Hotspur tan group stage paltlang turin Lask mualah chak a ngai dawn.

Arsenal erawh an match hmasa paliah an chak vek avangin an tlang chiang tawh. Gunners hian zanina an mikhual Rapid Wien lakah player naupang leh Premier League lama khel tam lo an chhawr thei ang.

Jose Mourinho enkawl Tottenham hian Premier League hma an hruai mek a, Europa League lamah erawh an chet sual zauh avangin an la tlang lo; point kua hmuin an chunga awm Antwerp nen an point neih a inzat.

Spurs hi an hnuaia awm Lask aiin point thumin an sang zawk, Mourinho naute an chak a nih chuan an tlang chiang dawn. Austrian club hi an chak a nih erawh chuan pahnihnaah an kai chho dawn a, team pahnih tan inkhel pawimawh a ni.

North London club hian tun hnaiah match hautak an khel hnem. League-ah Manchester City leh Chelsea an hmachhawn zawn a, an hmabak chu an hmelma Arsenal a la ni bawk - manager tan luhaina tham a ni.

Nomawi an duh miau avangin Spurs tan Europa League ngaihthah a thiang bik lo. Toby Alderweireld (khel bawr) leh Erik Lamela (chawn) te hliam vangin an inlan thei dawn lo. Blues laka hahchawl Carlos Vinicius, Gareth Bale, Gio Lo Celso, Lucas Moura, Ben Davies leh Davinson Sanchez ten bul an ṭan a rinawm.

Team pahnih an intawn hnuhnungah EPL club hian 3-0 ngawtin hnehna an chang thei a, zaninah pawh chak tura rinkai zawk an ni. Amaherawhchu tun ṭuma an inkhelhna tur hi London khawpui ni loin Linzer Stadion a ni tawh dawn, boruak a danglam thei.

Hneh sawh takin Europa League group stage an paltang a - lawmna tur a ni. Amaherawhchu an team khelh dan phung leh league lama beisei an phak loh em avangin fans an lungawi thei lo, manager Mikel Arteta-a'n kar tawpa Spurs an hmachhawn tur hre chunga a naute a siamrem ang.

Tottenham an hmachhawn zui dawn avangin player dah ṭhat a ngai dawn. Thomas Partey, Gabriel Martinelli, Calum Chambers leh Pablo Mari te chu hliam vangin an la khel thei dawn lo, hrileng kai Sead Kolasinac a khel thei dawn lo bawk.

An match hnuhnung bera Wolves an hneh loh ṭumin David Luiz-a'n hliam a tuar bawk a, Brazilian defender hian khel chhunzawm thei mah se zaninah a chhawr thei dawn lo. A inlan theih loh tur thu hi club chuan an puang chiang tawh a ni.

Arsenal mikhual tur Rapid Wien hi group B-ah pathumna an ni mek, point ruk hmuin pahnihna Molde nen an point neih a inzat. Knockout round luh beiseina an la neih avangin chak an tum dawn.

Austrian club hian an player ṭhenkhat Tamas Szanto, Philipp Schobesberger, Christopher Dibon leh Dalibor Velimirovic te chu hliam vangin an chhawr thei dawn lo a, an ṭhat dan berin an khel thei dawn bik lo. Chutihrualin 'Arsenal B Team' hmachhawn tura ngaih an nih avangin beisei an nei ang.