Hamilton aiawh tur George Russell

Formula 1 champion Lewis Hamilton chuan coronavirus a kai avangin tun kar tawpah inelna a hmachhawn thei dawn lo a, a hmun ruak luah turin Mercedes chuan Williams driver George Russell an hman tur thu an tichiang.

Britain tlangval Hamilton-a'n nomawi a humhim hnuah pawh theihtawp a chhuah zel tur thu a sawi tawh. Amaherawhchu tunlai hri leng a kai avang hian loh theih lohin a chawlh rih a ngai dawn.

Kum 22 mi Russell chuan, "Lewis hmunruak hi tu tan maha luah khah theih chi a ni dawn lo, ka tan mawhphurhna a sang dawn hle tih ka hria. Theihtawp chhuah ka tum dawn, team lungawina thlen theih ngei pawh ka inbeisei," a ti.

Formula 1-ah driver leh team champion a chiang tawh. Hamilton leh Mercedes chuan an nomawi an humhim a ni. Tunkar tawp hian kar hmasaa an intlansiak tawhna Bahrain-ah bawk an tlan leh ang a, chumi hnuah Abu Dhabi Grand Prix chu an hmawr bawkna tur a ni ang.