Australian Open an sawn dawn?

Grand Slam hmasa ber Australian Open CEO Craig Tiley-a'n tournament neih hun tur an tichiang hnai tih a sawi a, French chanchinbu lian L'Equipe chuan Melbourne khawpuia inelna hi February thlaah khelh a ni dawn niin an tarlang.

Covid-19 vangin infiamna kalphung a buai a, tournament buatsaih dan tur pawh chawpchilh taka phuahchawp a ngaih chang a awm. Melbourne awmna state Victoria sorkar thuneitu lamin ram dang aṭanga player zin lut khung hran ngei an duh.

Player zin lutte hi ni 14 khung hran an nih chhungin training phalsak an ni dawn tih chu a chiang tawh. Mahse engtik hunah nge an zin luh ṭan dawn tih leh tournament khelh hun tur an la tichiang thei lo.

Ruahman lawk dan chuan January 18 aṭanga khelh ṭan tur a ni a, thla tawpah an zo ang. Amaherawhchu Tennis Australia (TA) pawhin a hun tur hi an puang chiang thei lo, khawthlang chanchinbu lamin an tarlan hi a dik a nih chuan kar thumin an sawn tlai dawn niin a lang.