Premier League kan nghak chhuak ta Champion Liverpool hmaah Leeds United

"Jurgen Klopp-a hnuaia Liver-pool heavy metal football hi hmuhnawm i ti em?" tiin Leeds United boss Marcelo Bielsa chu zawh a ni a, "Music ka hriatthiam ve loh avangin ka hre lo," tih chu a chhanna a ni!

Coach chanchin ngah ve tak Bielsa leh Klopp an inhmachhawn dawn a, hei ringawt pawh hi football ngainatute chuan an hmuh chak a ni - zanin dar 10:00-ah Anfield-ah Leeds United an lenglut dawn.  

Leeds United tan Premier League champion lai khelmuala lenluh nghal hi ṭawngṭai chhanna tia chhal a harsa ang tih a chiang a, Liverpool-in duh thlang thei ta se Leeds an thlang bik kher lo ang. 

Premier League kai thar ni mah se Leeds hi an club boruak lian hrim hrim pawh hi player tawnhriat nei ṭha lo tan chuan zampui tham a ni a, Marcelo Bielsa-a awm miau avangin dah hniam hleihtheih an ni lo bawk. 

Liverpool boss Jurgen Klopp-a'n Leeds an hmachhawn tur inbuatsaih nan nimin khan press-a hmachhawn a, nomawi chu humhim tur ni loin attacking hmanga hlawhchhuah tur a nih thu a sawi. 

Klopp chuan, "Nomawi kan humhim a ngaih thu min hrilhtu an awm a, nomawi hi humhim tur ni loin lak ngei tuma attack chi zawk a ni. Chu chu kei chuan ka hriatthiam ve dan a ni," a ti. 

German coach chuan champion nawn erawh thil harsa a ni dawn tih sawiin, "Team ṭha hlir kan tum dawn a, chuvang chuan engkim hi kan kutah a innghat. Ṭha thei ang bera kan khelh zel theih dan tur ngaihtuah a ngai a ni," tiin a sawi a, tih mai mai a tum lo. 

Liverpool hian nipui transfer-ah player lian leh langsar lak an nei hran lo a, Klopp hian player lak thar ṭeuha indinthar ai chuan a ṭha sa enkawl thiam dan zir a pawimawh thu a lo sawi tawh - zaninah a ṭha sa a la ṭhatpui reng leh reng loh a hriat ang. 

Coach danglam pahnih, chanchin ngah ve tak, an duhnaa ṭawngkam insum tum ngai lo pahnih an intawng dawn a, khaikhin an hlawh a nih pawhin a mak lo. 

Klopp chuan, "Bielsa hi ka ngaisang a, mahse a chanchin tak tak sawi tur erawhin kan inpawh tawk lo. An game ṭhenkhat ka en a, a team-te pawh an ṭha takzet. A mizia chiang taka ka sawi thei lo chungin ka ngaina a, coach zingah chuan a thawkrim ber pawl a ni hial mai thei," tiin a fak. 

Leeds boss hi pa danglam tak zawng a ni - Premier League-a a team a inhlankaipui chungin contract thar a ziak lo reng a, nizan khan kum khat atan conrtract-a pawhsei thu an puang ve chauh!

Kum 65 mi coach hian June 2018 khan Leeds hi kum hnih atan a zawm a, kum khat dang pawhsei theih dan a awm - he dan hi tihlawhtlingin a cham dawn a, contract thar lawmna ni pah fawmin chak a tum ang. 

Liverpool captain Jordan Henderson leh Joel Matip-ten hliam an neih reng hnuah club training an zawm ve leh tawh a, mahse Klopp chuan zaninah an inlan theih dawn leh dawn loh a sawi theih loh thu a sawi. 

Community Shield-a Hender-son tel loa an inlan ṭumin Liverpool hian Arsenal an ngam lo a, midfield-ah hruaitu an mamawhzia a lang - Hendo hi a dam a nih phawt chuan captain armband nen zaninah a inlan ang. 

Matip erawh tlarhnung laia ding turin Joe Gomez leh Virgil van Dijk an awm tho a, Klopp-a'n 'risk' lak nan a hman duh a rinawm loh a, bench lamah hun hmang tura beisei a ni. 

Leeds-in hliam vangin Gaetano Berardi leh Adam Forshaw an chhawr thei dawn lo a, lakluh thar Rodrigo leh Robin Koch erawh international duty aṭanga lo kirin harsatna an nei lo. 

Premier League-ah Leeds United an rawn kir a, kum 16 hnua rawn let ni mah se Championship lallukhum khum chunga rawn let an ni a, an manager Marcelo Bielsa a nih bawk avangin an thawm a ri ring nghal.

Mark Viduka, Harry Kewell, Lee Bowyer, Alan Smith, Lucas Radebe, Ian Harte leh Nigel Martyn te ho awm tawh lo mah se football ngainatute thinlungah Leeds hian hmun pawimawh tak a la chang pha reng.

Tun ṭuma Leeds chhuanvawr tur chu Kalvin Phillips te ho an ni a, 'Yorkshire Pirlo' hming lem an pek English midfielder hi Leeds chhul chhuak niin season ruk zet Peacocks (Leeds sawina) tan hian a khel tawh. Season liam taa an player pawimawh goal 17 khungtu Patrick Bamford bakah forward thlawptu Pablo Hernández, Mateusz Klich, Jack Harrison leh wing back Stuart Dallas bakah keeper Kiko Casilla te an la kawl vek.

Leeds hian inham tan ngei tumin Valencia aṭangin Spain tana khel pha Rodrigo chu pound maktaduai 26 zetin an la a, danglamna thlen thei player a ni. Peacocks-in season bul ṭan nawm nan manager Bielsa contract an pawtsei a, Argentine manager hi khawvel manager ṭha ber zinga mi a ni a, Pep Guardiola pawhin a ngaisang hle. Argentine manager-in top flight club ni lo a zawm hian mak tih a hlawh a, Leeds erawhin an vanneihpui. Season khatnaah Leeds hi playoff-ah an vanduai a, playoff hma hian automatic-a Premier League kai chhoh theihna hun ṭha an bawh pelh bawk.

Season hnihnaah erawh Leeds an chesual nawn tawh lo a, point 93 hmuin an champion. Bielsa hian kum hnih chauh contract a ziah avangin club dang zawm thei dinhmunah a ding a, amaherawhchu kum khat pawhsei theihna chu pawmin Premier League-ah Argentine manager hoin an khel dawn.

Premier League champion Liverpool hmachhawn nghal tur chuan Championship champion hi an ṭha nghal lo a ni thei a, amaherawhchu football-ah thil thleng thei lo a awm lo. Bielsa hi a khingpui tur manager dangte aia nasaa zir chi a ni a, hemi a nih avangin Leeds player-te chuan Reds nawr dan tur chu an bel viau dawn. Anfield-a inkhel tur ni mah se Jurgen Klopp-a hote tan point thum hi a hmin sa lo.