Fulham mualah Arsenal leng lut dawn

Vawiin tlai dar 5:00 hian Premier League 2020-21 season match hmasa ber khelh a ni dawn. Mikel Arteta enkawl Arsenal chu kai thar Fulham khel turin Craven Cottage-ah an lenglut ang - London derby hmangin English football inelna sang an khuh hawng dawn.

Gunners hian season hmasa kha a tir lam hmang chhe viau mah se siamtharna an chan hnuah hma an sawn a, an elpui tur an hautak dawn hlawm tih an hriat chian tawh avangin kuminah chuan a bul aṭanga chet fuh an tum tawh ang. 

Season hmasa khan Fulham hi Championship-ah palina an ni a, playoff-ah Brentford hnehin EPL atan an inpetkai. Player a nih laia tawnhriat ngah Scott Parker enkawl an nih avangin an match hmasa berah hian point hmuh nghal an tum dawn.

Pierre-Emerick Aubame-yang, a hming chauh pawh hi Arsenal ṭantuten an thlamuan pui viau. Thierry Henry dinhmun ang em kha chu la luah phak lo mah se tun dinhmunah chuan an captain leh innghahna a ni a, vawiin tlaiah pawh an hmachhuan a ni leh dawn.

Auba a awm avangin tlarhma chu ngaihtuah awm loa ngaih an ni, defender rinrawl David Luiz-a'n hliam tenau a nei a, a inlan a nih pawhin 100% fit a ni lo ang. Tlarhnungah Rob Holding leh Kieran Tierney bakah hmelthar William Saliba kan hmu a nih pawhin mak ti suh. 

Mikel Arteta naute hian league nomawi chawi chu an la tum ngam chiah lo ang, a sang pali zinga tel ngei erawh an tum dawn. Club ṭha leh lian dang an tam tawh avangin team nem zawk an hmachhawn chuan point thum hmuh ngei a pawimawh dawn.

North London club hian Chelsea winger hlui Willian an lalut a, Brazil international hi inkhel turin a inpeih. Defender thar Gabriel Magalhaes-a'n training zawm tawh mah se a inlan a la rinawm loh, season hmasa lama chhawr hlawh lo Mesut Ozil pawh manager-in a duh a nih chuan harsatna nei loa khel thei tura ngaih a ni.

Fulham manager Parker-a'n player a nih laiin Premier League hautakzia a hrechiang tawh a, tuna a team neih dinhmun chhutin table sang lama awm theih a inring lo, tla hniam leh nghal lo tura inhamtan chu an thil tum a nih thu a sawi.

Parker chuan, "Keini aia tawnhriat ngah leh squad chhah zawk kan hmachhawn nghal dawn, result ṭha kan nei a nih erawh chuan kan khelh hmabak atan a pawimawh hle ang. Match 38 khelh tur a awm dawn, chumi atan chuan a bul ṭan fuh a pawimawh.

"Kan thlen phak chin tur hi chhut thiam a harsa hle, chutihrualin tlahniam loa awm theih kan tum dawn. Club ṭhenkhat chuan EPL an kai hlim season-ah pawh dinhmun duhawm an lo chang tawh ṭhin, khatiang kha kan entawn tur a ni ang," a ti.

Fulham hian striker Alek-sandar Mitrovic an nei, season hmasaa goal 26 khung thei Serbian international hian tharum a ngah bakah a thiam tel - Gunners tlarhnung tana ven uluk ngai bik a ni dawn.