Ajax ngamtu Liverpool-in last 16 an lut

Liverpool-in Atalanta an ngam loh hnuin Dutch club ṭha Ajax chu 1-0 in an hneh a, match khat khelh tur la nei chungin Champions League last 16 an inpetkai.

Reds tan Curtis Jones chuan minute 58-naah he inkhela goal awmchhun hi a khung a, Ajax-in a chhanletna tur an nei lo. Group D inkhel dangah Atalanta chuan rin loh takin FC Midtjylland chu 1-1 in an inhnehtawkpui. 

Atalanta khelmualah FC Midtjylland-in minute 13-na leka Alexander Scholz goal khung hmangin hmahruaina goal an khung a, Italian club tan Cristian Romero chuan minute 79-naah si phurh a sut hram. 

Group D aṭang hian Reds-in last 16 lut chiang tawh mah se a ngaihnawm chhunzawm dawn a, December 9 zana Ajax leh Atalanta inkhela chak zawkin Liverpool hnung an zui dawn - Atalanta tan point khat hmuh belh a tawk ang. 

Liverpool fan-ten Ajax an hma-chhawn hmain thu ngaihthlak nuam lo an hria a, chu chu an goalkeeper chhuanvawr Alisson Becker inhliam thu a ni. 

Klopp-a'n Alisson awm loh laia a rin ṭhin Adrian chungah rinna a nghat ngam lo a, academy chhuak Caoimhín Kelleher chu Champions League match pawimawhah goal a ven tir. Irish goalkeeper hi kum 22 mi ni tawh mah se Ajax a hmachhawn hmaa Reds tana a goal ven tawh zat belhkhawm chu match li a ni a, Premier League leh Champions League-ah a la inlan ngai lo - a tawnhriat a chhuanawm 

loh hle. 

Alisson thiamzia hrilh nawn kan ngai lo a, Kelleher-a thiamna hre tur erawhin a inkhel lai kan la hmu tam tawk lo - Reds fan-ten an hlauthawng a nih pawhin a awm lo hran lo. 

Liverpool fan-ten rinhlelhna nen Kelleher an thlir a, a chhanna an hmuhah erawh an lawm ang. Season hmasaa Liverpool tana a match hmasa ber khel ve chauh keeper hian a khel ṭha takzet a, Liverpool-in point thum an hlawh theih chhan tiin a sawi theih.  

Kelleher hian Brazilian forward Antony-a shot ṭha tak chu a dansak a, a per lehlam hi David Neres chuan post tih per nan a hmang. Everton midfielder hlui Davy Klaassen chuan hnai set sawt aṭangin a tauh out bawk. 

Ajax tana penalty box pawn aṭanga Noussair Mazraoui-a shot ṭha zet Kelleher-a'n a kut pakhat hmanga a dang te chu pui tak a ni a, substitute Klaas-Jan Huntelaar-a goal khung tur a dansak phei chu 'class' tia sawi a rem ber. 

Inkhelh zawhah Jurgen Klopp chuan Kelleher hi panin lawmthu sawi nan a kuah a, hei hian Irish goalkeeper chet dan thui takin a hrilhfiah a, Reds-in inkhel an thunun lo tih a nem-

nghet bawk. 

Rawlthar duhawm Curtis Jones-a'n goal awmchhun a khung a, kum 19 leh ni 306 mi Jones-a goal siamsaktu hi kum 19 leh ni 232 mi Neco Williams a ni - Premier League club tana Champions League-a kum 20 tling lo player-in a rawlthar pui tana goal-a assist hmasak ber a ni. 

Liverpool-in Ajax aiin chance an nei tlem zawk a, inkhela chak phu zawk thlan tur ni se Dutch club lamah fans tam takin an ban an phar ang - mahse, Liverpool-in a pawimawh ber goal an khung tlat. 

Merseyside club hi chance nei tlem lutuka sawi bik erawh a rem lo - Jones hian goal a khung hmain post a tih per a, Mohamed Salah chuan a hun ṭha neih a chhawr hman lo bawk. 

Ajax-in tharum hmangin Liverpool goal nawr na lutuk tur dan chah an tum a, foul pawisa miah loin an khel - Jones goal vangin an vanduai a, an hlawhtling teuh hle. 

Liverpool tan captain Jordan Henderson chuan inkhel bul a ṭan a, hliam vanga chawl reng midfielder-in November 8 hnua club tana inkhel bul a ṭan leh hmasak ber a ni. Reds player inhliam zingah mid-fielder Naby Keita (malpui) leh right back Trent Alexander-Arnold (chawn) an lo kir hnai a, Virgil van Dijk (khup) chu tun season-ah a inlan leh thei a nih chuan a lawmawm lam a ni ang. 

Joe Gomez (khup), Xherdan Shaqiri (malpui), James Milner (malpui), Thiago Alcantara (khup) leh Alex Oxlade-Chamberlain (khup) te lo kir hun tur sawi lawk theih a la ni lo bawk! Alisson-a'n a malpuiah hliam a neih ve leh tak avangin December 6 zana Premier League match-a Wolver-hampton Wanderers an hmachhawn hunah leh December 9 zana Midtjylland an lenchilh hunah a inlan thei dawn lo chiang ang - senior player pakua an inhliam mek 

tihna a ni.