Jeje a dam; East Bengal an damlo

East Bengal fan-ten Indian Super League-ah an beisei ang result an la hmu thei lo. Kolkata derby-ah ATK Mohun Bagan an ngam loh hnuin Mumbai City FC lakah 3-0 in an tlawm leh ta a, Robbie Fowler leh a naute an mualpho. 

Season hmasa tluan hliam vanga a inlan loh hnuin Jeje Lalpekhlua'n khelmual rapin hun a hmang ve leh ta. Jeje hian minute 67-a Balwant Singh a thlakin East Bengal hian goal thum an chhuah tawh a, Hnahthial tlangval tan danglamna thlen a harsa tawh. 

Squad pumpui thlir pawhin East Bengal aiin Mumbai City an ṭha zawk a, an coach Sergio Lobera lah Indian football-a tawnhriat nei ṭha sa a nih bawk avangin Mumbai hian chak tura ringtu an ngah zawk. 

Sydney FC aṭanga loan hmanga an hawh Adam Le Fondre chuan minute 20-na lekah goal hmahruai a khung a, minute 48-naah penalty hmangin a khung chhunzawm - minute 58-naa Hernan Santana-a'n goal thumna a khung meuh chuan chak tur a chiang tawh. 

East Bengal-in assistant coach atan Renedy Singh an nei a, Mumbai lakah pawh Manipur midfielder Surchandra Singh leh Wahengbam Angousana-ten inkhel bul an ṭan. Season hmasaa Mumbai City tana match hnih chiah khel Surchandra hian East Bengal match hnihah bul a la ṭan ve ve. 

Mumbai left back Mandar Rao Dessai chuan Surchandra tihsual hmangin Hugo Boumous tan chance a siam a, Debjit Majumder chuan ṭha takin a dang. Mumbai goal hmasa ber pawh hi Surchandra tihsual vang tho a ni a, Boumous-a'n duhthala a tlanpel hnuin Le Fondre tan a siamsak a, Bolton Wanderers striker hlui tan goal-a chantir a harsa lo. 

Mumbai tana inkhel thlak danglamtu chu French attacking midfielder Boumous a ni a, an goal hnihna luh nana penalty pawh hi ama hlawhchhuah a ni. Ahmed Jahouh-a ball siamsak chu Boumous hian um lutin East Bengal keeper Majumder chuan a lo ti tlu a, penalty a chawi. 

Le Fondre chuan penalty hi goal-ah a chantir a, goal thumna pawh Boumous hlawhchhuah bawk a ni. Jahouh-a free kick ṭha tak aṭanga ball kal chu Boumous chuan Santana tan a siamsak a, Sporting Gijon aṭanga Mumbai zawmtu hian goal-ah a chantir. 

Khup hliam vangin Jeje-a'n ni 600 chuang zet a inkhel tawh lo a, tun season-ah beiseina sang tak nen East Bengal a zawm - match hmasa berah 100% a la nih loh avangin a inlan lo a, Mumbai lakah pawh bench-ah dah a ni. 

Minute 67-naah Jeje a lut ve chauh a, ball ṭha a hmuh loh miau avangin Mizo Sniper a hlauhawm thei lo. Minute 90-naa a bll ṭha hmuh chhunah Jeje hian Mumbai defender chak pahnih chu tharum leh thiamna hmangin a bum a, mahse a shot neih chu Mohammad Rakip chuan a kein a lo dang hman. 

Jeje Lalpekhlua chuan, "Kan training ho har avangin kan la inman tawk lo a, Mumbai hi team ṭha tak leh inhre chiang sa an nih avangin result hi chu rin lawk sa ang deuh a ni. Kan hneh lo deuh tih a lang a, mahse game hnihna chauh a la nih avangin hma kan sawn zel ang," tiin Vanglaini a hrilh. 

Hnahthial tlangval chuan Mizo mipui ṭawngṭaipuina ngen nghalin, "Keima khelh dan bikah chuan ka lawm a, hun rei tak hnua khelmual ka lut ve leh thei ta hi Pathian vang a ni. Mizo mipuite min ṭawngṭaipui vang a ni tih pawh ka hria a, ka lawm takzet - Mizo footballer-te tana lo ṭawngṭai zel turin Mizo mipuite ka sawm duh a ni," a ti a, Vanglaini kaltlangin Mizo mipui ṭawngṭaipuina a ngen. 

East Bengal coach Robbie Fowler-a'n, "Indian player ṭhenkhat hi chu coaching ṭha tak la dawng lo an ni tih a lang a, Indian player-te siamṭhat tumin kan bei ang," a ti a, Liverpool legend hian ram chhung player a neih chhiat hrim hrim ai mah chuan a thlan 'dan' a thiam lo zawk niin a lang a, ram pawn aṭanga a lakluh player-ten beisei an phak bik lo tih a hmuh hmaih bawk - chhuanlam tur tingin defender Daniel Fox chu minute sarihna lekah hliam vangin an chan bawk. 

Kolkata club-in an hma-chhawn tawh Mumbai leh Mohun Bagan foreign player-te enin East Bengal ram pawn player an ṭha tawk lo tih a lang a, a bik takin Jacques Maghoma hian season hmasa lawk khan Birmingham City tan a khel tih hi a khelh dan en chuan awih a harsa zawk.