Arteta nihna thar manager

Team enkawl lamah tawnhriat a la ngah loh avangin Arsenal a zawm tirh khan 'head coach' nihna pek a ni a, hun rei lote chhunga danglamna nasa tak a thlen avangin tunah chuan 'first team manager' nihna pek a ni ta.

Arteta dinhmun leh thuneihna hi tun hma aiin a sang sawt dawn tihna a ni. Manager ropui Arsene Wenger ang em em a thuneihna pek vek ni rih lo mah se a dinhmun hmasa aiin a thu zawk dawn tih erawh thil chiang a ni.

Wenger chhuah hnua a hmunruak luahtu Unai Emery kha 'manager' nihna pek a ni lo, coach lailawk Freddie Ljungberg hnua awm nghet zuita Arteta erawhin player a nih laia amah enkawltu Wenger hnung a zui.

Arsenal chief executive Vinai Venkatesham chuan, "Kan club-in kum 134 chhunga kan hun tawn harsat ber laiin Arteta a rawn lang a, ani hian hun harsa tak karah pawh lawmna min thlen. Hun rei tak chhung contract nei a ni a, a lakah mawhphurhna sang zawk kan hlan.

"Premier League nomawi chuh phak zinga awm kan duh a, chutiang bawkin hun rei tak chhung kan khelh tawh Champions League-a inlan leh pawh kan tum, tuna kan awmna hi chu kan nihna tur tak a ni lo," a ti.

Spanish manager Arteta hian season tharah a sang pali zinga tel phak a tum tur thu a sawi tawh a, engtik niah emaw chuan European football inelna sang berah nomawi chawipui a tum bawk, a duhthusam tih hlawhtlin tumin hna a thawk ṭan mek.