Atletico tan nghah a la ngai
La Liga lama season duhawm tak hmangtu Atletico Madrid chuan Champions League match-ah an ṭhat dan bera khel lo Bayern Munich chu 1-1 in an inhnehtawkpui a, last 16 lut tur chuan December 9-a Red Bull Salzburg an lenchilh hunah draw result aia hniam neih a thiang lo ang.
Atletico Madrid tan hian season duhawm tak hmangtu Joao Felix chuan minute 26-na lekah goal hmahruai a khung a, Spanish club hian German champion lakah hnehna an chang mai dawn niin a lang hman.
Mahse, hun tawp nan minute li chauh a awm tawh tihah bench aṭanga luhtir Thomas Muller lakah Atletico centre back Felipe a lo foul a, penalty a chawi. Kum 31 mi Muller hian a penalty hlawhchhuah hi goal-ah a chantir a, tun season inelna hrang hranga match 17-a khelh aṭanga a goal sarihna a ni a, assist vawi kua a nei tawh bawk.
Bayern Munich hian Atletico an hmachhawn hma hian last 16 an lut chiang tawh a, hei vang hian coach Hansi Flick chuan goalkeeper Manuel Neuer, midfielder Leon Goretzka leh striker Robert Lewandowski chu squad-ah pawh a telh lo a, Serge Gnabry leh Muller-ten bench-ah hun an hmang thung.
Chelsea academy player hlui Bright Arrey-Mbi leh Jamal Musiala-te chu Bayern tana bul ṭan zingah an tel a, a bik takin September-a 8-0 a Schalke an sawp ṭuma Bayern tana goal khung thei naupang ber record siamtu, kum 17 mi Musiala a hmuhnawm hle.
Inkhel thununtu Atletico-in an result thlirin an ui vawng vawng ang a, khel ṭha em em mai Felix a khawngaihthlak lehzual - pound maktaduai 113 man player hian a man phu angin a khel chhuak ṭan ta a, tun season inelna hrang hrangah match 14 khela goal riat khungin assist vawi thum a nei tawh.
Group A inkhel dangah Red Bull Salzburg chuan 3-1 in Lokomotiv Moscow an hneh a, German club Salzburg tan Mergim Berisha chuan first half chhungin goal hnih a khung. Russian club tan Anton Miranchuk chuan minute 79-naah penalty hmangin si phurh sut ṭhen mah se minute hnih hnu lawkah Karim Adeyemi chuan Salzburg tan a khung ve leh a, match tawp ber thlenga beiseina nei turin 3-1 in an chak.