Mick Schumacher-a'n Haas a zawm

Michael Schumacher fapa, kum 21 mi Mick Schumacher chuan Formula 1 team Haas a zawm a, season tharah chuan car intlansiakna sang berah a hmel kan hmu tawh dawn.

United States beh-chhana team din Haas leh Mick te inremna hi kum khat aia rei tiha ziak a ni, German rawlthar hi Russian driver Nikita Mazepin nen an inkawp ang. Ferrari driver academy chhuak Mick chuan, "Season tharah Formula 1 huanga ka awm tur hian minti hlim takzet. Ka chunga rinna nghat ṭhintu Ferrari leh min ring ngamtu Haas chungah ka lawm takzet," a ti.

Formula 2 series kal laiah Mick hian hma a hruai mek a, tun kar tawp hian final round neih tur a ni ang. Season tharah chuan a pa Michael ke hniak a zui ṭan dawn tawh thung. Haas team boss Gunther Steiner chuan, "Mi enbik leh hmuh duh a ni a, a chungah beiseina pawh a sang dawn. Kan thawkho thei tur hi a lawmawm a, keini chuan a ṭha ber dinhmun a thlen theih nan kan pui ang," a ti.

Mick-a pa Michael Schumacher hi F1 driver hlawhtling leh ropui bera ngaih a ni. World champion nomawi vawi sarih zet a chawi a, car intlansiakna sang berah hian ṭum 91 ngawt hnehna a chang.