FIFA buaina Russia leh Qatar rinhlelhna a zual zel

Tunhnai FIFA buaina in ziaawm lam a pan hleithei lo. FIFA president aṭanga a chawlh tur thu puangtu Sepp Blatter-a special advisor ṭhin Guido Tognoni chuan Russia leh Qatar chuan World Cup thleng tura thamna sum tam tak an sen a rin thu a sawi chhuak.

Kum 2003-a FIFA-in a hna aṭanga an chawlh tir Tognoni hi Blatter a hnimhnaitu leh a rinrawl ber ni ṭhin a ni a, Russia leh Qatar World Cup thlen danah dik lo awma rinhlelh vanga Swiss Court-in FIFA a chhuichian mek laia hetia a ṭawngchhuak hian titi a ti tam hle.

FIFA dik lohna chhuichiang tura UEFA pawh lo thawhpui tawhtu Tognoni chuan, "FIFA-ah hian i duhzawng ti puitling tur chuan sum tam tak i sen a ngai. Chu chu hun rei tak chhung FIFA-in kalphung pangngaia a lo neih tawh a ni," a ti.

Hetihlai hian Russia leh Qatar chuan Swiss Court-in thubuai an siamsakna hi an pha nasa hle a, dan dik tak hmanga World Cup thleng an nih thu an sawi.

FIFA hruaitu lawk zinga mi Domenico Scala chuan Russia leh Qatar hian thamna sum hmanga World Cup hi an lo thleng thei a nih takzet chuan World Cup thlengtu tur dang ruat an nih tur thu a lo sawi tawh bawk a ni.

Scala thusawi erawh kum 1990 chho leh 2001-2003 inkara FIFA media director leh chief marketing officer Tognoni chuan a pawm ve lo. Tognoni chuan, "Russia leh Qatar hian thamna sum lo hmang ngei pawh nise tu ber hi nge dem tur nichuang ang? FIFA nge dem tur thamna sum chelek lo thei loa an siam ram pahnih te hi tih hi zawhna awm thei a ni," tiin thamna sum chelek lo thei lo a World Cup thlen tumte ti khaw loah FIFA a puh.

Thawhṭanni khan FIFA lam pawhin thuchhuah siam ve nghalin tuna zawhna awm zawng zawng chu Swiss Court-in a chhui chian mek a nih avangin dawt leh thudik lo awm lo a a chhan thuai an beisei thu an sawi a, vawiin thlengin FIFA World Cup thlen danah ram pahnih in tih dik loh an neih thu tihchianna engmah a la awm loh thu an sawi bawk.