Aston Villa-in neitu thar a nei hnai

Premier League club Aston Villa chuan neitu thar a nei hnai a, a hming tarlan loh Villa lei duhtu leh tuna Villa neitu nihna nei mek Randy Lerner te chuan inbiakna an kalpui mek nia sawi a ni. Villa lei duhtu zinga thawm nei na tak Paul Smith hming erawh lam rik a ni lo.

Season hman zawh tak Premier League-a 17 na ni pha ṭawk Villa hi a lei duhtu chuan an lei ngamna zat club neitu American sumdawng hausa Lerner hnenah an thehluh a ngai a, Lerner hian a lei duhtu te'n an ngamna zat hi a lo pawm a nih chuan kar ruk hun chhungin tihfel ngaite an ti fel dawn a ni. Kar ruk hi hman zawh a nih hma chuan an inrem ta lo a nih pawn Villa lei duh dang an inrawlh a thiang lo.

Villa lei duh anga an sawi hmingthup in a ngamna zat hi Villa lamin an pawm tawh nia sawi a ni a, kar ruk chhungin tih fel ngaite tih fel hman tura ruahman a ni.

Kum 2006, Septem­ber-a pound maktaduai 55 a Villa leitu Lerner hian a club hi pound maktaduai 200 tala hralh a duh nia sawi a ni a, Chelsea chief executive hlui Paul Smith-a lei ngamna zat pound maktaduai 150 chu a lo hnar tawh nghe nghe. Mahse, Smith hi ala beidawng mai bik lo, tuna Villa lei tumtu leh Lerner te inbiakna hi a tlawlh hlauh chuan Villa lei tum hian a sum a thehchhuak leh dawn nia sawi a ni.

FA Cup finalist Aston Villa hlut zawng hi pound maktaduai 300 nia chhut a ni.