Renault nen kan inzawmna a tawp hnai - Horner

Red Bull team boss Christian Horner chuan an motor engine supply tu Renault nen an inkar a ṭhat loh thu leh inṭhen thei reng an nih tawh thu a sawi.

Renault hian tunah hian Formula 1 team pahnih Red Bull leh Toro Rosso engine an supply mek. Kum 2016 thleng engine supply tur hian inremna an nei mek a ni. Kum dangah chuan chhe ṭha ṭhin viau mah se nikum leh kuminah Mercedes leh Ferrari te an el pha lo hle. Kum 2007 aṭang khan Red Bull leh Renault te hi an lo thawk dun tawh a ni.

Kum tharah Formula 1 inelna an chhuahsan mai theih thu sawiin Renault Sport boss Cyril Abiteboul chuan, "Renault hian midangte elphak engine kan siam chhuak thei mai lo a nih chuan kum thar aṭang chuan Formula 1 inelna hi kan chhuahsan a ngai hial ang," tiin a lungngai hle.

Kum 41-a upa Horner chuan, "Tunah chuan kan inkar a ṭha lo tih chu phat rual a ni tawh lo. A bik takin Renault hian an mahni chhungah harsatna an neih hi an chinfel a ngai ang. Thutlukna siam harsa tak a nih dawn avangin kan inngaichang tawn a, anmahni lam inhuamna leh intiam kam dan a zirin kan hma hun chu thui takin a hril ang," tiin a sawi.