Barcelona hlawhtlinna phena mi pawimawh Cruyff

Ball tel loa player bum dan chi khat 'Cruyff turn' ti famkimtu Johan Cruyff hrechiang tan chuan tunhnaia Barcelona hlawhtlinna nen hmeh bel hi a inhmeh viau ang a, hre pha lo tan erawh Pep Guardiola sulhnu a hmuh len theih viau bawk ang.

Tunge Cruyff?

Hendrik Johannes Cruijff hi April 25, 1947 khan Amsterdam, Netherlands-ah apiang a, a seilenna khaw club Ajax-ah inzir chhuakin Ajax rinrawl a ni zui. Cruyff hian Ajax hi Dutch league Eredivisie-ah vawi riat a champion pui a, European Cup-ah kum zawnin vawi thum a champion pui bawk.

Ajax-ah nomawi chawi theih apiang a dawn hnuah Barcelona a zawm a, La Liga leh Copa del Rey-ah a champion pui. Cruyff hi player ropui a ni a, chumi tichiangtu chu a hlawhtlinna chan hi a ni. Ballon d'Or ṭum thum a dawng a, 1974 World Cup-ah FIFA World Cup-ah Golden Ball a dawng bawk.

Player ropui hi manager ropui a ni a, Ajax leh Barcelona hlawhtling takin a enkawl.

Total Football

Tun hma chuan player tin hi an position-ah an nghet deuh chut zel a, defender chuan a attack ve ngai lo a, forward-in goal venhim hna a thawk ngai lo.

Ajax-in Rinus Michels kaihhruaina hnuaiah 1965 leh 1973 inkar khan 'total football' an khel ṭan a, he khelh dan hmangah hi chuan defender pawhin a ṭul phawt chuan an attack ve tawh.

Khawvela huapa total foot­ball larna erawh 1974 FIFA World Cup kha a ni a, Netherlands chu pahnihna ni mah se an khelhdan hmangin khawvel mipui thinlung a hneh a, game kalhmang hlawhtlinna kawnga player langsar ber chu Dutch captain Cryuff a ni.

Barca lamah chuan...

April 28, 1988 zan dar 7:00-ah chuan Hesperia hotel-ah Barcelona player 21 leh head coach Luis Aragones te chu an inhmukhawm a, an hotel awmkhawmna hi Nou Camp aṭangin car-in minute nga kal lek a ni.

Captain Alexanko chuan, "President Josep Lluis Nunez hian min bum a, professional player kan nihna angin min zah lo a ni. Club tana a ṭhat zawk nan president hi rang taka a ban kan phut a ni," tiin an thutlukna siam chu chhiar chhuak.

Player-te buaina siam hi 'Hesperia mutiny' tih a ni a, president-ah kum 1979-a La Masia din thartu Nunez a nih zui zel avangin keeper Andoni Zubizarreta chu player pawimawh zingah a him a, player ṭha 15 ngawt hralh chhuah an ni.

May 4, 1988-ah Johan Cruyff chu coach atana lak luh a ni a, Dutch manager hian player lakkhawm hna a ṭan nghal a. player 12 a lak luh zingah winger Txiki Begiristain, attacking midfielder Jose Mari Bakero, centre-forward Julio Salinas leh defensive midfielder Eusebio te chu an langsar zui hle.

Dutch manager hnuaiah Barca-in hma a sawn chho a, La Masia hlawhtlinna a lang chho bawk. Cruyff hian Potuguese manager Jose Mourinho ang lo takin 1-0 a chak ai chuan 5-4 a chak a duh a, attacking game khelh a duh.

Cruyff-a hnuaia player pawimawh Eusebio chuan, "Blackboard-ah chaun defender pathum, midfield pali leh winger attack-na tur tawp pahnih bakah centre forward pakhat chu a ziak kalh a. 4-4-2 leh 3-5-2 an hman uar laia 3-4-3 formation kan hmang tur chu mak kan ti hle. Amaherawhchu a khelh dan hmangah a chiang a, Spain-ah kalhmang thar a rawn siam," tiin a sawi.

Cruyff chuan a khelh dan hmang sawi fiahin, "Kan khelh dan hmang min sawisel a, ka chhanna chu 1-0 a chak aiin 5-4 a chak ka duh tih a ni. Keeper Andoni Zubizarreta setpiece ven dan tur min zawh ṭumin, 'Kei aiin goal venhim i duh zawk a, i duh dan i thlang dawn nia' tiin ka hrilh," tiin attacking game a ngaih pawimawh thu a sawi.

Cruyff-a kaihruaina hnuaiah kum khat chhung hlawhtlinna an hmu lo. Squad a chhah tawk loh avangin La Masia an hman ṭangkai a ṭul. Kum 1986 khan La Masia lut tur player trial neih a ni a, 1.80m a sang chin chauh lak tur a ni. Kum 15-a upa naupang pakhat chuan, "1.80m aiin ka sang dawn. Professional footballer ka ni dawn," tiin a inrintawk takin a sawi a, he naupang hi Pep Guardiola a ni.

Dutch manager awm hnuah hian Barca Under 8 thlengin 3-4-3 an hmang a, player lian lo pawh La Masia-ah an la lut a. La Masia chhuak palian lo ve tak Ferrer, Amor leh Sergi ten Catalan club tana an khelh zat belhkhawm chu match 1000 a tling hial. Cruyff hi awm ta lo se chuan Lionel Messi, Xavi leh Andres Iniesta te hi kan hmu kher lo ang.

Cryuff-a hnathawh a lang thuai a, 1989-90 season-ah Copa del Rey-ah an champion a; 1990–91, 1991–92, 1992–93, 1993–94 season-ah La Liga-ah an champion a. 1991-92 khan Barcelona chu a vawi khatna atan European Cup-ah an champion a, hemi ṭuma Barca team hi 'Dream Team' tihin hming lem an vuah a, Barcelona hlawhtlin puitu Guar­diola pawimawh zingah a tel.

Cryuff hian Barcelona hi nomawi 11 a lak pui a, a enkawl chhuah Guardiola-a'n a record hi kumin nomawi 15 a lak pui. Kum 1996 khan Cruyff hi result ṭha neih loh avangin Barcelona manager aṭangin ban a ni a, amaherawhchu Catalan club tana a bul ṭan hi a rah a lang chho mek zel a ni.