West Ham manager thar Slaven Bilic

Premier League club West Ham chuan nimin khan manager thar an neih thu an puang a, an mana­ger thar hi Croatia national team pawh lo enkawl tawh Slaven Bilic a ni.

Player a nih laia West Ham tan pawha lo khel tawh Bilic hian kum thum cham turin Upton Park-ah hian contract a ziak a, thla hmasa khan a club enkawl lai Turkish Super Lig team Besiktas chu a chhuahsan a ni.

Russian Premier League team Lokomotiv Moscow te pawh lo enkawl tawhtu manager chuan, "West Ham hi nuam ti taka ka lo inkhelh tawh ṭhinna hmun kha a ni a, ka tan chuan in ang mai a ni. Vawiinah he team enkawl tura ruat ka ni hi ka tan chuan chawimawina leh mawhphurhna lian tak a ni a, min ruaitu board, player leh fan-te tan an beisei ang result hlawhchhuah pui ka inbeisei a ni," a ti.

Kum 46-a upa mana­ger chuan, "Club hruaitu te nen kan in biak khan he club ropui tak hi club ropui lehzuala siam an duhna kha ka hrethiam a, ka tan chuan he hmun lo pan tura thutlukna siam kha a awlsam em em a ni. West Ham fan-te hnena ka tiam duh chu ka theihna zawng zawng he club tan hian ka hlan anga, kan vaia kan thawhho phawt chuan thil ropui tak tak kan sualchhuak ngei ang," tiin London club-ah hian hlawhtlin a tum ruh hle.

Coach rorum tia an sawi ṭhin Slaven Bilic hian kum li chhung West Ham-a enkawl hnua Upton Park chhuahsantu Sam Allardyce a thlak dawn a ni.