Rafael Nadal a hniam zel

Thawhṭanni khan ATP ranking thar ber tih chhuah a ni a, Grand Slam vawi 14 champion tawh Rafael Nadal chu 10 naah awmin kum 2005 hnua a hniam ber ṭum ala ni.

Spanish kum 29-a upa Nadal hian kar hmasa khan French Open quarterfinal-ah Novak Djokovic a hneh lo a ni. April 2005 khan kum 19 mi chauh niin world number 11 a lo ni tawh a, hmemi hnu hian hmasawn chho zelin number 1 pawh a ni hman hial. Mahse tunhnaiah Nadal-a'n beisei a pha lo chhunzawm zel rih.

World number 1 nilai Djokovic chuan a dinhmun ngai ala luah chhunzawm rih a, a hnuai chiahah Roger Federer awmin Britain star Andy Murray-a'n a zui bawk. French Open mipa champion hlim Swiss chhuanvawr Stan Wawrinka chu palinaah a invawrh chho thung.

Hmeichhe lamah a vawi 20 nana Grand Slam champion hlim Serena Williams chuan hma a hruai fal zel. Williams hi Czech lam mi Petra Kvitova-i'n a dawt a, ani hi palina aṭangin pahnihnaah a invawr chho a ni. Russian star chhelo Maria Sharapova a tlahniam a, Kvitova leh Simona Halep tluk loin palinaah a awm.

Wimbledon khel leh tura inpuahchah chhunzawm nghal Nadal chuan, "Ka khingpuite keini aiin an ṭhain an thiam zawk a nih chuan kan pawm thiam mai tur a ni. Tunlaiah chuan Novak hi kei aiin a ṭha zawk tih chu phat rual a ni lo ang, mahse tun hmaa ka dinhmun ngai luah leh turin theih tawp ka chhuah dawn a, ka lo kir leh ang," tiin a sawi.

Wawrinka chungchang sawi chhunzawmin Nadal chuan, "A thiam bakah tharum a neih ṭhat avangin player hlauhawm tak a ni tih kan hmu vek tawh. Tun laia a hmasawn dan kan thir chuan ani dan hi hna hautak tak a ni dawn tih a chiang. Thiam leh ṭha tak takte nena inel hi ka nuam tih zawng tak a nih avangin a ṭha thei ang bera khel chhuak thei turin Wimbledon atan ka in puahchhah ngawrh hle ang," tiin beidawng lo a beih beih zui zel a tum thu a sawi.