Bruyne-a'n a chhuah chhan a hrethiam lo

Wolfsburg playmaker Kevin de Bruyne chuan tun thlengin Chelsea manager Jose Mourinho-a'n a chhuah tir chu a hraitthiam loh thu a sawi.

Belgium international hian January 2014 khan Chelsea aṭangin Bun­desliga club hi a zawm. He hi a chhan ber nia lang chu Mourinho-a'n Bruyne-a nungchang a duh loh vang nia sawi a ni. Mahse, Bruyne chuan Mourinho hian a ṭhatna turin thurawn a pek loh thu leh a dun dan a hrilh ngai loh thu a sawi ve thung. A khel ṭhat loh leh inthlahdah vang ni loin Mourinho chuan a chhuah tir mawl tawp niin a ngai.

Kum 25-a upa attac­king midfielder Bruyne chuan, "Tun thleng hian Mourinho-a'n Chelsea aṭang min chhuah tir ngawt nachhan kha ka la hrethiam thei lo. Ka hmalam hun chungchang pawh min sawipui ngai lo hrim hrim," tiin a lungawi loh thu a sawi.

Sawi chhunzawmin Bruyne chuan, "A tirah khan khelmual a hmun ka chan leh chan loh chu training na hmuna ka chet danin a hril tur thu min hrilh a, mahse chutiang chuan a ti lo. Thinrim vanga sawi chhuak ka ni lo a, mahse Mourinho-a'n ka chunga thil a kaltir dan hi a mak ka ti em a ni. Wolfsburg a min kal tir avanga Chelsea-in pawisa an dawn kha an duh ber chu ni maiin ka hria," tiin a sawi.

Kum 2012 khan Genk aṭangin Bruyne hian Chelsea a zawm a, mahse London club tan hian match thum bak ala khel lo. Wolfsburg-a a kal hma hian a club hlui Genk leh Werder Bremen-ah te loan-in a kal leh tawh. Tun season-ah Wolfsburs tan a khel chhe lo hle a, match 50 khelin goal 13 a khung. A team te hi Bundesliga-ah pahnihna a nih pui bakah German Cup a chawi pui bawk. Hetiang anih avang hian Chelsea laka Premier League nomawi hloh tu Manchester City nen pawh an sawi zawm leh mek tawh.