John Aldridge-a'n striker ṭha lei turin Liverpool a rawn

Liverpool striker ropui ṭhin John Aldridge chuan striker goal khung thei leh hming chher tawh sa lalut turin Liverpool a rawn.

Kum 1987-89 in­kara Liverpool tana goal 63 khungtu chuan Reds striker thar Danny Ings chungchang sawi lang nghalin, "Ings hi ngaihtuah buai pawh ngai loin striker ṭha a nihzia kan hre vek. Goal hmaa hlauhawm tak a nih bakah hma a la sawn dawn chauh a ni. Mahse, tuna kan mamawh ber chu player hmingchher tawh leh hriat hlawh sa a ni," tiin player lian lakluh an mamawh thu a sawi.

Republic of Ireland international hlui chuan season hman zawh taka Premier League goal 52 chiah khungtu Liverpool chuan striker goal khung thei an mamawh thu sawiin, "Mario Balotelli leh Fabio Borini te'n beisei an phak lo a, Rickie Lambert hian a vanglai a pha tawh lo bawk. Liverpool hian pawisa tam tak hman tur an nei a, hmang mai turin ka rawn a ni. Season khata goal 20 tal khung thei striker an mamawh a, chutiang striker chu an man a tlawm ngai lo," tiin Reds thuneitu te chu insen huam turin a ti.

Kum 56-a upa Aldridge chuan French club Lille-a loan a khel mek Belgian striker Divock Origi a lo kir tawh bakah September thlaah Daniel Sturridge hliam a damchian dawn vangin Reds chuan kawng dik lam an zawh ṭan mek nia a hriat thu a sawi bawk.