A pianna ramah Ben Arfa
Newcastle winger Hatem Ben Arfa chu a pianna ram France club Nice-ah a kal dawn ta. Tun season liamta khan Arfa hi Hull City-ah loan-in a khel.
Kumin January transfer lai khan Ben Arfa hian Newcastle aṭangin Nice hi a zawm dawn tih a chiang tawh a, mahse nikum chhung zawng khan Nice tan a khel thei lo. A chhan chu tun season liamta khan Arfa hian Newcastle U21 tan leh Hull City tan a lo inlan tawh vang a ni. FIFA danah chuan player pakhatin season khat chhungin club pahnih tan bak a khel thei lo.
A player thar chungchang sawiin Nice president Jean-Pierre Rivere chuan, "Ani hi 'messiah' ang mai a ngaih tur leh beisei tur a ni lo a, mahse a theihna leh thiamnate kan ngaihtuah chuan club hmasawnna thlen tur chuan a ṭha tawk hle a ni," tiin a sawi. Nice hian Ivorian midfielder Jean-Michael Seri chu an lo la lut tawh bawk.