Real-a kir pawiti lo Chicharito

Manchester United striker Javier Hernandez (Chicharito) chuan season hman zawh taka loan-a a khelhna Real Madrid a kir a hreh loh thu sawiin khelhna hun ṭha a neih chuan Manchester United-a cham hlen pawh pawi a tih chuan loh thu a sawi.

Mexico international striker chuan a tana pawimawh ber erawh inkhelhna hmun a chan tam theihna hmun a nih thu sawiin substitutes bench-a ṭhu tur ringawt chuan khawi club-ah mah khelh a chak loh thu a sawi.

Kum 27-a upa striker chuan, "Real-ah hian khelhna hun tam zawk ka chang leh thei dawn a nih chuan kir ka pawiti lo. Chutiang chu United-in min tiam a nih pawn Old Trafford-ah ka cham mai ang. Ka tan chuan inkhelh tam a pawimawh ber a, chu aia dah pawimawh chu ka nei lo a ni," tiin a khelh phakna tur club-a kal a duh ber thu a sawi.

Season liamtaa Real tan match 33 a inlan aṭanga goal kua khungtu Chicharito chuan, "Ka loan hun ka hman zawh khan Real hian min leina hun ṭha an nei a, mahse a hun laia min lei loh avangin ka tan chuan club dang nen an in ang reng tawh. Tunah hi chuan Manchester United player ka ni," a ti.

Real-a loan a kal tir tu United manager Louis van Gaal chungchang sawi langin Mexican striker chuan Netherlands manager hnuaiah hmun a chan theih a inbeisei a, "LVG manager a nih tirh khan Europe-ah kan inlan dawn loh avangin player tam tak a mamawh lo a, min chhuah ṭhen tir a ni. Tunah chuan Europe-ah kan inlan dawn avangin player tam zawk a mamawh a, a mamawh chhanna zinga mi nih theih ka inbeisei a ni," a ti.

Chicharito chuan Real boss thar Rafael Benitez nen inbiakna an neih loh thu sawiin, "Min la rawn be rih lo a, min rawn bia a nih chuan ka lawm khawp ang. Mahse, a pawimawh ber erawh inkhelh tam a ni. Real pawh nise, United pawh nise khelhna hmun ka chan tam dawn loh ai chuan hmun ka chan tam theihna tur club pan hi ka duh ber a ni," a ti.