Juvenuts player thar Khedira

German international midfielder Sami Khedira chuan kum li chhung cham turin Juventus a pan dawn. June thla tawp ruala a contract hmang zo tur Khedira hian free transfer-in Turin hi a pan dawn a ni.

Kum 28-a upa Real Madrid midfielder hian kum 2010 FIFA World Cup zawh rual khan Spain hi a pan a, player pawimawh leh ṭangkai ni chhoin an innghahna ber pakhat a ni hman. Mahse, kum 2013 aṭang khan a khup hliamin a tibuai ṭan a, a hliam vang hian tun thlengin Bernabeu-ah hmun nghet a chang thei tawh lo.

Real Madrid hian nikum nupui lai khan Bayern Munich aṭangin Toni Kroos an lakluh bawk avangin 2015-ah chuan Khedira hian vawi khat mah Real tan a khel tawh lo.

A tharum ngah leh fin em avangin Premier League-ah pawh player hlawhtling tak anih theih beiseiin Arsenal, Liverpool leh Manchester United te pawhin an beisei vek. Mahse, heng English club lian tak tak te ai chuan Italian champion zawm hi a thlang ta a ni.

VfB Stuttgart aṭanga Real Madrid a pan hnuah Khedira hian a club tan match 102 khel hmanin goal ruk a khung. A club tan hian La Liga nomawi pakhat, Copa del Rey pahnih leh Champions League te a chawi hman a ni.

Khedira hma hian Juve manger Massimiliano Allegri chuan Palermo striker Paulo Dybala chu pound maktaduai 23-in a lo lalut tawh bawk.