India team an inpuahchah ngawrh

2018 FIFA World Cup Qualifiers third round atan India chu ngawrh takin an inpuahchah.

India hi Group D-ah Iran, Oman, Turkme­nis­tan leh Guam te nen an awm ho a; June 11, Ningani khian Ben­ga­luru-ah Oman an mi­khual dawn a, June 16 khian khualmualah Guam an hmachhawn leh ang.

Inrinni khan India national team hian Indian Army te training-na hmun ASC Centre-ah sipai training an hmachhawn a, India football history-a a vawi khatna a ni.

India coach Stephen Constantine chuan, "Player-te hi an theihna tak tak kan hriat a ngai a, hun harsa kan hma­chhawn hian naupang leh puitling danglamna a hriat ṭhin. Sipai hi an in khuahkhirhna a ṭha a, anni chu hun harsa an tawna an chetsual chuan nunna an chan ṭhin. Hei vang hian an training-naah hian pressure sang tak leh hun harsa hnuaia awm dan a zir lawk. An training-na ṭang hian hlawkna tam kan hmu a, an chungah kan lawm hle a ni," tiin a sawi.

All India Football Fedederation chuan India Army hnenah India leh Oman inkhel enna tur ticket 5000 an pe.

India squad-ah hian player 26 an awm mek a, player 23-a sawr zim leh tur a ni.

I League-a Mohun Bagan champion puitu Jeje Lalpekhlua chuan, "Army training-na hmunah khan coach-in kan ti dawn tih a sawi lo a, sipai ho ti lai kan en phawt a. Kan tih dawn khan invenna kha a awm mang si lo a, a tirah chuan kan huphurh khawp mai. Mahse kan tih zawh takah chuan chona thar min siamin ka hria," tiin Vanglaini palai a hrilh.

Jeje chuan sawi chhunzawmin, "Player thar an awm nual avangin khelh dan hmang a tir aṭangin kan zir ṭha leh a, hun a duh ang reng khawp mai. Kan inkhelh tur hi a pawimawh a, Oman-ah hian player ṭha tak tak an tam avangin keini tan chuan theihtawp piah lam kan chhuah a ngai a ni. Mizo mipui ṭawngṭaipuina kan mamawh takzet," a ti.

India team-a vawi khat telna Bengaluru wing back Lalchhuanmawia chuan, "Ni khatah vawi hnih training kan nei a. Zing lamah fitness kan khawih a, tlai lamah khelh dan hmang kan zir. Player pathum paih a la ngai a, theihtawp ka chhuah a, a bak chu Pathian thu thu a ni," tiin a la tlin chian loh thu a sawi.

Lengpui tlangval chuan sawi zelin, "Sipai training kha chu vawi khat chauh tih atan chuan a nuam phian mai. Amaherawhchu thirlen hnuaia bawkvak a kal erawh a thui deuh avangin kiu leh khup a na duh khawp mai," tiin a sawi.