Arsenal-a cham tur Podolski

Germany international Lukas Podolski chuan a contract neihna North London club Arsenal-ah season thar a la châm dawn thu a tichiang.

Kum 2012 khan Podolski hian FC Koln aṭangin Arsenal hi a zawm a, a club tan hian match 60 khel tawhin goal 19 a khung tawh. Beisei anga a chet ṭhat tawk loh vang leh tlarhmaah player langsar dang an awm avangin hmun a chang tam lo.

Tun season liam ta January khan Podolski hi Inter Milan-ah loan-in a kal a, mahse, Italian club-ah pawh hian beisei angin a che ṭha lo. Match 18 a khelhah goal khat chiah a khung thei.

Turkish football club Gala­tasaray-ah Podolski hi a kal dawn niin an sawi a, an ram Germany club Werder Bremen nen pawh sawi zawm a ni mek. Mahse, hetiang thu leng vel karah hian Podolski chuan Gunners-ah hmun nghet chan tuma beih a la tum thu a tichiang ta a ni.

Kum 30-a upa striker Podolski chuan, "Ka hmalam hun tur chu a chiang thawkhat tawh e, season tharah chuan hmun danga kal loin Arsenal-ah ka awm ang. Arsenal hi club ropui tak a nih avangin he hmuna khelh hi ka duh a, club ti hlu tu leh ti ropui zual tu nih ngei ka tum leh ang," tiin a sawi.

Inter Milan-a a hun hman chung­chang an zawhna chhangin Podolski chuan, "Khawi hmunah pawh inkhel ila kan khelh puite aṭangin zirtur tam tak kan neih bakah tawn hriat kan neih belh zel ṭhin. Dik tak chuan Inter-ah khan season ṭha tak chu ka hmang lo tih ka hria. Mahse kha mi vang khan ka buai lo a, hmalam hun a eng zawngin ka thlir mek zawk a ni," tiin a sawi.

Podolski hian Germany tan match 123 khel tawhin goal 48 a khung tawh a ni.