Alves-a'n Barca-ah contract thar a ziak
Barcelona defender Dani Alves chuan kum hnih dang Nou Camp-a cham turin contract a ziak. June 30 2017 thleng Barca-ah a cham dawn a ni.
Alves-a contract neih lai hi tun thla tawp rual hian a tawp ve tawh dawn avangin English club lian Liverpool leh Manchester United te nen pawh sawi zawm a lo ni hman. Mahse, tunah chuan a hma hun tichiangin a chhuak dawn ta lo.
May thla khan Alves hian Champions League final zawh hnuah a hmalam hun tur a tih chian tur thu a lo sawi tawh. Inrinnia Barca-in Juventus 3-1 an hneh hnuah a hma hun tur hi sawi chiangin kum sarih a lo chamchih tawh club hi kum hnih dang a chenchih leh dawn.
Thawhṭanni khan Barcelona hian Aleix Vidal an lo lalut a, ani hi Alves thlakna tura ngaih a ni hman. Hetiang a nih takah chuan Vidal leh Alves hian hmun lailum chan tumin ṭha zawk nih an inchuh a ngai ang.
Kum sarih chhung Barcelona-a hun a hman chhungin Brazilian defender Alves hian Champions League nomawi pathum, La Liga nomawi panga bakah Spanish Cup pathum a chawi tawh a ni.