Transfer-ah goalkeeper an langsar David De Gea, Hugo Lloris, Petr Cech

Inrinni khan Spain training-na hmun Las Rozas-ah Iker Casillas leh David de Gea te an thleng rual a, car an dah fel zawhah supporter-te autograph an ziahsak hnuin inbe miah loin training-na hmun an pan.

Spanish keeper pahnih hi season thara Real Madrid keeper tur anga sawi an ni a, inelna boruak a awm ṭan nghal dera ngaih a ni! Media lamin transfer hun laia boruak siam an thiam a, player lei huai Real Madrid leh Manchester United -te an inrawlh tlat avangin goalkeeper-te hian thawm an nei lian hle.

Real ka zawm duh - De Gea

Louis van Gaal chuan chawlh hman hmain David de Gea chungchanga thuneitu chu club lam an nih loh thu a sawi a, thutlukna siam tur chu Spanish keeper a ni.

United hian an keeper rinrawl De Gea chelh tumin kar khata pound nuai hnih hlawhtheihna contract thar ziah pui an tum a, De Gea advisor pawhin Madrid a zawm hmain England-a kum hnih la awm turin a hrilh bawk.

Amaherawhchu Goal.com-in a tarlan danin Spanish keeper hian a rilru thlak a tum lo, Manchester United hotute hnenah Real Madrid zawm a duhthu a hrilh tawh.

United hian Spanish club lian lakah hian Cristiano Ronaldo, Ruud van Nistelrooy, Gabriel Heinze leh David Beckham te an chan tawh a, De Gea an chan leh a nih pawhin a mak lo ang.

Real Madrid vanneihna chu De Gea hi Spanish a ni a, a bialnu pawh Spanish a ni. Hei vang hian Spanish keeper tan Real leh United inkara duhthlan hi a harsa lo.

De Gea hian kum 2011 khan Atletico Madrid aṭangin pound maktaduai 17.8 in United a zawm a, 2013-14 leh 2014-15 season-ah United's Players' Player of the Year a thlan a ni. United hi Premier League-ah vawi khat a champion pui a, Professional Footballers' Association's Team-ah ṭum hnih telh a ni bawk.

De Gea thlaktu tur

January thla khan Van Gaal-a'n Barcelona goalkeeper hlui Victor Valdes chu thla 18 atan contract a ziah pui. United tan match hnihah chauh an inlan a, khelhna hmun a neih chhan hi De Gea inhliam vang a ni. United no. 1 atan Ductch manager hian a ringtawk lo niin a lang.

Van Gaal hian Costa Rica kee­per Keylor Navas kha 2014 World Cup a chet ṭhat avangin United hruaitute hnenah la lut turin a hrilh. Amaherawhchu Real Madrid an ngam lo a, Spanish club-in euro maktaduai 10-in an la lut.

Real-in De Gea an chhuhsak a nih chuan Spanish club-in Casillas an neih tho avangin United hian Navas lak luh an tum thei a, hei erawh rinthu mai a ni.

France no. 1 - Lloris

Tottenham goalkeeper Hugo Lloris chuan season tharah Champions League khelh a duh a, Spurs-in Europe-a club inelna sang ber an khelh dawn loh avangin United a zawm hreh lo.

France no.1 keeper Lloris chuan, "Tunah chuan United-in keeper an nei a, an dinhmun hi kan thlir ve reng a ngai. Thil thleng tur a awm dawn a nih chuan a rawn awm thleng mai ang," tiin United a zawm hreh loh thu a sawi.

Pathianni France-in Belgium an hneh loh ṭumin Lloris hi a khel tluan. French keeper chuan, "Spurs player ka ni a, kum 2019 thleng contract ka la nei. Kan manager, club leh player puite ka zah a; ka hmalam hun chungchang hi ka sawi duh lo. Chutihrualin player zawng zawng khelh chak chu Champions League a ni," tiin a sawi.

Kum 28-a upa Lloris hian kum 2012 khan Lyon aṭangin Spurs a zawm a, Tottenham tan league-ah match 99 a khel tawh.

Cech ve thung

Chelsea-in Belgian keeper Thibaut Courtois an neih avangin kum 33-a upa Petr Cech-a'n season tharah Stamford Bridge a chhuahsan dawn a, a kalna tur a la chiang lo. Czech Republic keeper tawnhriat nei ṭha tak hi United nena sawi zawm a ni a, mah se Cech hian Arsenal lam a awn nia tarlan a ni.

Czech keeper Cech chuan, "Chhuak tur chuan club nen kan inrem phawt a ngai a, kar leh khian Chelsea nen kan inbia ang. Tunah chuan ka agent a pawimawh a, duhthlan tur club a chiang tawh a, uluk takin kan ngaihtuah ang," tiin chhuah a tum thu a sawi.

Veteran keeper chuan sawi chhun­zawmin, "England, Ger­many, France emaw Spain-ah chuan ka khel duh vek. Chutihrualin London-ah hian kan awm nghet a, hmun danga kan kal dawn a nih chuan chenna tur bakah fate school kalna tur thlenga kan buaipui a ngaih dawn. Season ṭan hmaa hahchawlhna hun ka neih theih nan thutlukna siam vat a ṭul a ni," tiin a kalna tur a chiang lo a, a sawi dan hmang aṭangin London club Arsenal lama a kalna chance a sang hle.