Insiamṭhat mamawh Wilshere

England manager Roy Hodgson chuan Arsenal midfiel­der Jack Wilshere chuan a hma­lam hunah buaina nasa zawk a tawn zel loh nan mahni inthunun a zir a pawimawh thu a sawi.

Kum 23-a upa Wilshere hi Arsenal FA Cup champion lawmnaah an hmelma kumhlun Tottenham Hotspurs tih elna hla a sak avangin FA chuan an hrem a ni.

England national team enkawl­tu Hodgson chuan, "Wilshere a khawsazia hi ṭha kan ti lo a, khatiang nungchang kha hmuh kan inbeisei lo. Mahse kum lama la naupang deuhte hi chuan an tih loh tawp tur tia inchhir leh hi an ching em em a ni," tiin Wilshere chu a la naupan deuh vanga nungchang mawi la hre lo angin a sawi.

Fulham leh West Brom manager hlui chuan, "Ka tana pawimawh ber chu a theihna leh thiamna hi a ni a, a nungchangah ka buai hman lo. Nundan ṭha leh awmdan mawi chu FA leh a club khelhna Arsenal-in an zirtir tur a ni," tiin Arsenal chu an player ṭangkai thunun deuh turin a ngen.