Hmeichhe World Cup USA leh Cameroon an chak chiang

Canada-a hmeichhe World Cup khelh mekah nimin khan USA leh Came­roon te'n an khingpui an sawp a, Japan pawh penalty hmangin an chak hram.

USA-in an match hma­sa berah Australia hmachhawnin 3-1 in an sawp a, United States tan Megan Rapinoe chuan goal hmahruai minute 12 na lekah a khung a, Aussie hmeichhe football team tan Lisa De Vanna chuan minute 27 na lekah a sut ve nghal.

Mahse second half minute 61 naah Christen Press chuan US tan an hmahruaina goal a khung ve leh a, goal hmasa ber khungtu Rapinoe-i'n goal khat danga a rawn chhun­zawm ve leh avangin 3-1 in USA an chak ta a ni.

Cameroon hmeichhia pawh an duai lo, nimin a inkhel dangah Ecuador chu 6-0 in an sawp. Came­roon hian penalty vawi thum hmuin an pet goal vek a, Enganamouit chuan hat-trick a siam a ni.

Champion lai Japan-in kum 2011 a an trophy chawi an ram lama hawn leh ngei an tum a, nimina inkhelah 1-0 in Switzerland an hneh. 2011 hmeichhe World Cup-a USA hnehtu Japan tan Aya Miyama chuan first half-ah penalty aṭangin goal a khung a, an chakpui ta a ni.

Thawhṭanni zana Swe­den leh Nigeria inkhelah goal a lut hnem a, 3-3 a in­hnehtawkin an ṭin a ni.