Pro Panja Mega Match - A hun a thleng ta!

Mizorama a vawi khat nan ban inelh hmanga inelna hmuhnawm, Pro Panja Mega Match chu zanin dar 7:00 hian AR Lammualah neih a ni dawn. Asia champion Denic Lalruattluanga chu inlan tur zingah a tel - a hmunah en man a awm dawn lo a, a free-a luh theih a ni. TV leh online lama en duh tan Zonet chuan pay-per-view in a ti chhuak dawn a, Rs. 100+tax lekin a en theih ang.

Pro Panja League leh Sports & Youth Services, Mizoram ṭangkawpin an buatsaih tur inelnaah hian Mizo arm wrestler ṭha, Lunglei Venglai tlangval C. Lalnunpuia, Chaltlang Lily Veng chhuanvawr Raymond K. Lalrinpuia, Tlangnuam Venthar lam mi Vanlallura leh Champhai tlangval B. Lalremruatkima te an inlan dawn bawk.

Denic-a hian Kazakhstan lam mi Assanali Nurmagambet a hmachhawn dawn a, ITI Veng tlangval hian, "Ka huphurh miah lo a, ka tiatpui ka hneh lohna chhan tur ka hre lo," tiin a lo sawi tawh a, Mizo mipui hmaah a theihna tak tak pholan a tum dawn.

Hei le Denic

October thla khan Asian Arm Wrestling International Cup 2024 chu Mumbai khawpuiah neih a ni a, hetah hian Mizo tlangval Denic-a chuan hnehna hlado chhamin, 80kg (Senior Men Right hand) huangah gold a hlawh chhuak.

Denic hian Asia huapa medal a hlawhchhuah hma hian national level-ah pawh gold a lo hlawh chhuak fo tawh a, Mizo mipui nawlpuiin kan hmelhriatna erawh Mumbai khawpuia gold medal a lak hi a ni - zaninah live ngeiin Denic-a chetla lai en theihin a awm dawn ta.

Denic chuan, "Mizo mipui, a tam thei ang ber min en tura lo kal turin ka sawm duh. Mizo mipui tam tak hmaa inelna hmachhawn ka duh a, hei hi ka tan chauh ni lo, ka Mizo arm wrestler puite tan pawh a hlu dawn a ni," a ti a, Vanglaini kaltlangin Mizo mipui ṭawiawmna a sawm.

Mizoram tan

Denic-a hmachhawn tur Assanali Nurmagambet hi Kazakhstan ban elh chak a ni a, eizawn nana arm wrestling hmang lai a ni - Kazakh mai ni lo, khawvel huap pawha arm wrestling academy lar Shardara Armwrestling Academy-a awm a ni.

Mizo tlangval Denic-a chuan, "Assanali hi arm wrestler ṭha tak a ni a, mahse, Pathian zarah huphurh tak tak hi ka nei lo. Ka mihring mihrinna chuan a hlau lo - Mizo mipui hmaa tlawm hi ka hlauh ber ania, hneh ngei ka tum ang," tiin Vanglaini a hrilh.

Denic-a chuan zanin atan inbuatsaihna ngawrh taka a neih thu a sawi a, Mizo mipui hmaah ennawm ropui chhawpchhuah tumin a inbuatsaih mek.

Tute nge?

Zanina Pro Panja Mega Match neih turah hian match kar lakah zai ngaihthlak tur a awm ṭhin dawn a, Denic-a inlanna tur hi 'main event' a ni - zai tur zingah youth icon star J. Lalrosanga a tel.

Mizo arm wrestler dang inlan turte pawh a ṭha ber ber thlanchhuah an ni dawn a, a hmuhnawm dawn. All India Police Meet-a vawi tam lo champion tawh Nunpuia hi Police Meet-ah pawh Champion of Champions pawh vawi thum ngawt lo ni tawh a ni.

Nunpuia hian Kazakh arm wrestler ṭha Bekzhan Ramiyanov a hmachhawn dawn - an inlanna tur hi 110 Kg huang a ni a, patling heti tiat 'inelh' chu a hmuhnawm loh ring suh!

Indian lam

Zanina inlan tur zinga mi Raymond hi India aiawh hiala lo feh chhuak tawh niin, a hmachhawn tur Tridip Medhi hi Assam lam mi a ni a, a record a ṭha hle - vawi sarih national champion a ni tawh a, Asian champion hial a lo ni tawh bawk.

Vanlallura hi Pro Panja League lama hming lo chher tawh, Indian arm wrestling-ah chuan hriat hlawh tak a ni - a hmachhawn tur hi Assam lam mi tho Nilay Sankar a ni a, ani pawh national level-a champion tawh a ni.

Remruatkima hi national junior-a Mizoram aiawh thei, hmabak nei êng tak a ni - a hmachhawn tur Ishan Kashyap hian national leh Asia thlengin sulhnu lian a lo hnutchhiah tawh a, a en tlak khawp ang.