Amad-a'n Manchester khawpui a hnawih sen

Machester khawpui a sen leh ta a, a hnawh sentu chu Amad Diallo a ni. Pathianni an khan Etihad Stadium-ah Manchester Derby khelh a ni a, mualneitu Manchester City-in Josko Gvardiol hmangin khung mah se mikhual team-in a tawp an khar ṭha zawk. Manchester United-in hun tawp hma hretin Bruno Fernandes penalty hmangin siphurh an sut a, penalty hlawh chhuaktu Amad-a'n second 115 hnuah chakna goal a khung.

Ruben Amorim-a'n thla liam ta November 5, Thawhlehni khan Sporting Lisbon kaihruaiin Man City hi Champions League-ah 4-1 in a sawp a, thla khat leh a chanve hnu lekah Portuguese manager hian Man United enkawlin Pep Guardiola hote a hneh nawn. Man City buaina belhchhahin a awm a, Man United tan kawl a êng ṭan.

Rashford leh Garnacho?

Manchester khaw club pahnihin season bul ṭan chhe ve ve mah se Manchester Derby erawhin ngaih a hlawh reng a, inkhelh hma aṭangin boruak a ṭang. Amorim-a'n City hmachhawn tur squad a puang a, Marcus Rashford leh Alejandro Garnacho te hming a awm lo.

Portuguese manager thutluknain sawisel a hlawh a, chutihrualin Amorim-a'n ngaihdan nghet tak a nei tih a lang. Rin lawk ang ngeiin Andre Onana, Matthijs de Ligt, Lisandro Martinez leh Bruno Fernandes ten bul an ṭan a, anni hi chu an dam ṭhat chuan bul ṭan tura ngaih an ni tawh.

De Ligt leh Martinez te kianga awm turin Harry Maguire thlan a ni a; Noussair Mazraoui leh Diogo Dalot te chu wing back an ni. Tlarhnung pui turin Manuel Ugarte leh Fernandes te an awm a, tlarhmaa mal tlat Rasmus Hojlund pui turin Amad leh Mason Mount te an awm thung.

Defender pathum tho!

Pep Guardiola-a'n defender pathum hmang ṭhin Amorim-a enkawl team hmachhawn turin defender pathum bawk a rawn hmang a, hrem vanga Rico Lewis khel thei lo chhan pakhat a ni thei bawk.

Goalkeeper Ederson hmaah Kyle Walker, Ruben Dias leh Josko Gvardiol te an intlar a, Ilkay Gundogan leh Matheus Nunes te chu midfield lai luamtu an ni. Erling Haaland a mal tlat a, a hnungah Ilkay Gundogan, Kevin De Bruyne, Phil Foden leh Jeremy Doku te an intlar.

Gundogan leh Doku te chu mual sir lam aṭanga nawr tura dah an ni. City hian kar laihawl khan UCL-ah Juventus an hneh lo a, Turin-a chak lo team aṭangin Pep-a'n Lewis leh Jack Grealish te thlakin, an aiah Nunes leh Foden te an lut thung.

City tan Gvardiol

Manchester City an chungnung hret a, mualneitu hian ball chang tam hretin goal chance erawh inseam an harsat. Man United erawhin Ederson an hna an siam lo hrim hrim.

Goal chance thiam bik De Bruyne-a'n Haaland tan ball ṭha pek tum ṭhin mah se a pe fuh thei lo a, Doku ball pek pawh Norwegian striker hian a nang fuh thei lo.

Man United lamin City tlarhnung ṭum khat an rum ṭhaih a, Amad-a'n keeper chauh a hmachhawn hnuah goal-ah a khung lo - khung pawh ni ta reng se offside vangin pawm a ni lo ang.

City-in goal an khung hmasa ta zawk a, minute 36-naah corner kick hmang ṭangkaiin Gvardiol-a'n ṭha zetin a tauh lut. Pep-a hoten goal an khung hmasa a, Amorim-a hote erawhin set piece aṭangin goal an chhua leh tawh.

Man United-in first half-ah chanchin duhawm an nei meuh lo a, hliam vangin Mount chu minute 14-na lekah thlak a ngaih avangin Kobbie Mainoo a rawn lut. Mainoo hian Fernandes position rawn luahin United captain hi tawl hma hretin Mount a hmunruak a luah thung.

Amad Show

Man City-in goal khatin hma hruai mah se an khelh dan aṭangin inrintawka nei bik lo tih a lang a, Pep-a nauten ṭum dang angin pressure an pe na lo. Chutihrualin Amorim-a kaihhruai Man United-in hma an sawn tih a lang a, City player-ten pressure an pe chungin anmahni lamah chuan ball an in pass thei tlat tawh.

Maguire a chet ṭhat miau avangin Haaland dah ṭhatin a awm a, hmun hlauhawmah United winger Amad a luh ngam miau vangin City tan buaina tur a awm ṭan ta bawk. Minute 62-naah Fernandes-a ball vawrh luh chu Amad-a'n a tauh a, Ederson-a'n a dang ṭha hle.

Hun tawp lamah Man United an nung thar a, Mazraoui-a'n harsa taka a lakchhuah nuah Hojlund a pe a, Danish striker hian City defender Dias leh Gvardiol te inkarah a thawlh nalh hle. Fernandes a rawn tlan lut ṭha a, mah se United captain hian keeper Ederson a pet khum thei nachungin goal pawnah chiah a kal.

United defender Martinez-a ball vawrh luh a ṭha a, Mainoo ball tauh a ṭhat loh avangin mikhual team-in siphurh an sut thei mai lo. Mahse, Amad a beidawng lo a, Ivorian winger hian hma a sawn mual dinglam sira Nunes chiang taka a bum chuan inrintawkna a ngah tih a lang.

Amad-a'n a tlan peih rah a seng a, Nunes-a back pass chu Ederson-a'n a chan hmain a la hman. Ivorian winger hian goal-ah khung thei nghal lo mah se ball pass sualtu Nunes-a'n rawn titluin penalty a hlawh chhuak. Pressure sangah Fernandes a rawn pen chhuak a, minute 88-naah penalty aṭangin siphurh a sut.

Man United tan Etihad Stadium-a point khat hlawhchhuah hi a lawmawm a, mahse point khatah an la lungawi lo. Injury time-ah Martinez-a ball vawrhluh chu Amad-a'n um lutin ball sawt kang leh chiah chu hmun awl lamah a la per a, Ederson-a tan tih ngaihna a awm lo. Ball kang lai chu Amad hian goal-ah a pet lehnghal a, defender Gvardiol rawn tlan let ṭha mah se a dang fuh lo a, goal-ah a lut.

Second 115 chhung lekin inkhel kal hmang a dang vek a, Man United 2-1 in an chak a, Amad chu a changtupa a ni.