Ka ṭha tawk lo - Guardiola

Manchester derby zawhah khawvela manager ṭha ber zinga mi Pep Guardiola'n mawhpuh tur a zawng lo a, ama thiam loh a nih thu a sawi chhuak. Chutihrualin Pep hian City a zawm hnuah Premier League nomawi paruk, FA Cup pahnih, League Cup pali bakah Champions League, UEFA Super Cup leh FIFA World Cup nomawi pakhat ṭheuh a chawi tih hriat a ṭha.

Manchester City-in an mual Etihad Stadium-ah an hmelma Manchester United 2-1 in an hneh lo a, Premier League champion lai leh a zawna vawi li champion thei ni mah se nomawi humhim a harsa dawn. Pep-a hote hian hmahruaitu Liverpool chu match khata an khel tlem chungin point kuain an pha lo a, a sang pali zingah an awm pha tawh lo bawk.

Spanish manager Pep Guardiola chuan, "Thuneitu ka ni a, manager ka ni a, a chinfel dan ka hmu chhuak tur a ni. Tun dinhmunah chuan ka ṭha tawk lo. Kan ti ṭha tawk lo a, chu chu thu dik a ni," tiin a mawhphurhna a nih thu a sawi.

Man City hian October thla tawpa Tottenham hneh loh vanga League Cup aṭanga an tlak aṭang khan result ṭha neih an harsat. November thla chhungin match nga an khel a, Feyenoord nen UCL-a 3-3 a an inhnehtawk tih loh chu an chak lo vek. City hneh loh hi Bournemouth (2-1), Sporting Lisbon (4-1), Brighton (2-1) leh Tottenham (4-0) te an ni.

December thlaah pawh khua a la var chuang lo, champion tura elpui Liverpool 2-0 in an hneh lo a, Nottingham Forest 3-0 in sawp mah se Crystal Palace (2-2) leh Juventus (2-2) te nen an inhnehtawk a, Manchester United lakah an tlawm leh bawk.

Pep Guardiola chuan, "Sawi tur vak a awm lo a, goal kan venghim thei lo a, chutihrualin Manchester United kha an ṭang lui thei em em bawk. Season hnih chhungin vawi riat pawh kan chak lo tling ngai lo a, tunah erawh engkim a danglam," tiin a sawi. City hi Premier League-ah vawi nga an chak lo tawh a, League Cup (1) leh UCL (2) chhiar telin tun season-ah vawi riat an chak tawh lo.

Man City hian Rodri inhliam an tuar tih chu zep rual a ni lo a, chutihrualin Spanish midfielder tel lo pawh nise tun ang em em a, talbuai tur chu an ni lo. Pep Guardiola hian ban a la tawk ngai lo a, City hian ban tumna la nei lo mah se Spanish manager hi a chen ngai lohna ramah a cheng mek.

Pep-a'n City a enkawl ṭantirhin sum an hmang nasa a, tunah erawh sum an lalut tam tawh thung. Tun nipui bazarah khan player hralhna aṭanga an sum hmuh chu £158.85 mtd a nih laiin player lakluh nan £23 mtd chauh an hmang. Troyes aṭanga £21mtd-a an lakluh Savinho-a'n £81.5 mtd-a Atletico Madrid pantu Julian Alvarez a tlak zo lo.

Hei chauh hi a ni lo, City squad-a hmun pawimawh changtute an upa ve ṭan niin a lang. Pep-a hnuaia player pawimawh bera chhal theih Kevin De Bruyne a vanglai hun a liam a, Kyle Walker leh Barcelona aṭanga lak let İlkay Gündogan te pawh an kum a tam ve ṭan. Beiseina sang tak nena an lakluh Jeremy Doku leh Jack Grealish ten danglamna an thlen thei ṭhin lo a, goal khung khawl Erling Haaland pawhin 'nil' ṭum a ngah.

Tun Krismas leh kumthar vuakvetah hian City an tho chhuak thei ang em tih chu zawhna lian tak a ni a, Pep-a hote hmabak a awl hret dawn avangin mangchhia pawh a tawp hnai tura ngaih a ni. Champions League-a PSG an tlawh hmain Aston Villa, Everton, Leicester City, West Ham, Salford City, Brentford leh Ipswich Town te an hmachhawn ang.

Pep chuan, "Kan dinhmun ka hria a, tun aiin kan khelh ṭhat a ngai. Kan ṭhat dan bera khel turin kan result a ṭhat a ngai a, tunah erawh kan result a ṭha rih lo. Ka inzir thiam danah chuan hmalam pana kal zel hi a ni," tiin a sawi a, a la beidawng lo.