Man United kal hmang thlak ngamtu Amorim

Ruben Amorim-a'n Manchester United a zawm tirhin Ruud van Nistelrooy chu coaching staff-ah a telh lo a, hei hi a bul ṭanna chauh a ni. Portuguese manager hian Manchester derby-ah Marcus Rashford leh Alejandro Garnacho te squad-ah a dah lo.

Man United boss chuan, "Engkim ka ngai pawimawh. An thil ei te, inkhelh dawna an inchei duh dante ka ngai pawimawh. Chung zawng zawng chu ka teh hnuah thutlukna ka siam ṭhin.

"Ka thutlukna siam dan an hria a, hrilh nawn leh kher a ṭul tawh lo. Player-te hi an fing em em a, thutlukna siamtu ka nih miau avangin player ka thlan a ngai. Hei hi an hrethiam vek," tiin Rashford leh Garnacho te a thlan loh chhan a sawifiah.

Portuguese manager chuan sawi chhunzawmin, "Training zawh apianga kan tih ṭhin angin WhatsApp kaltlangin Garnacho leh Rashford te pawh thil awm dan ka hriattir. An hrethiam a, zing lamah training an nei a, keipawh ka awm. An ti ṭha e," tiin derby match khelh zingah training an neih thu a sawi bawk.

Amorim hian a duh dana player-te an khelh theih nan a thuneihna player-te chungah a keng kawh a, a duh dana training-te chauh an khelh tur thu a sawi.

Man United-in result an nei ṭha zui a, Rashford pawhin Amorim-a thutlukna a pawm tih social media kaltlangin a lantir a, TV-a United chak lai thlalak pholangin an result avanga a lawm thu a ziak tel bawk.

Inkhelh banah Amorim-a'n starting XI tur an hriat lawk ṭhin chungchang a sawi lang. Man United boss chuan, "Keipawhin ka lo hria. Tunlai chhanah chuan dan theih pawh a ni lo. Tu lo tihdarh nge tih hriat a har a, thil ṭha pawh a ni lo. Hmalam panin han kal phawt ila, kan inkhelh leh hunah an lo hre lawk leh ang em, tih kan hria ang chu," tiin a sawi a, hmalak ngei a tum niin lang.

Man United hi December 19, Ningani zan dar 1:30 hian Tottenham nen League Cup quarterfinal-ah an inhmachhawn dawn a, December 22, Pathianni zanah Bournemouth an mikhual lehnghal ang.